काठमाडौं – टिकटकबाट चर्चामा आएकी मोडल प्रिज्मा खतिवडा र कलाकार सागर लम्साल ‘बले’बीचको मनमुटाव चर्किंदै गएको छ।

प्रिज्माले पत्रकार प्रकाश सुबेदीसँगको अन्तर्वार्तामा सागरको कारण आफू मानसिक, सामाजिक र नैतिक तनावमा परेको खुलासा गरिन्। यो विवाद दोस्रो पटक प्रहरी कार्यालयसम्म पुगेको छ।

के भयो?

प्रिज्मा र उनकी बहिनी प्रिन्सी ‘ट्विन गर्ल’का रूपमा चर्चित छन्। म्युजिक भिडियोमा राम्रो माग रहेको उनीहरूको जोडी बलेसँग नजिकिएको थियो। दर्शकले यी दुईको रिल जोडीलाई मन पराए, जसले प्रेमसम्बन्धको चर्चा समेत ल्यायो। तर, दुवैले प्रेम अस्वीकार गरे पनि यो गसिप विवाहसम्मको हल्लासम्म फैलियो।

२०७८ मा उनीहरूको सम्बन्ध टुटेपछि सहकार्यसमेत बन्द भयो। प्रिज्माका अनुसार, सागरले पटक-पटक सहकार्यको प्रस्ताव राखे पनि उनले अस्वीकार गरिन्। यति मात्र होइन, उनले सागरले आफ्नो फोटो र भिडियो दुरुपयोग गरेको आरोप लगाउँदै प्रहरीमा उजुरी दिएकी छिन्।

सागरमाथि गम्भीर आरोप!

प्रिज्माको दाबीअनुसार, सागरले आफ्नो फ्यान पेज आफैं चलाएर प्रेमसम्बन्धलाई प्रमोट गर्ने, बिहेपछि पनि प्रिज्मासँगका भिडियो पोस्ट गर्ने जस्ता गतिविधि गरेका छन्।

प्रहरीमा उजुरीपछि दुई पक्षबीच सहमति भएको थियो, जसअनुसार सागरले प्रिज्मासम्बन्धी पोस्ट हटाउने तथा अप्रत्यक्षरूपमा पनि उनलाई नसम्बोधन गर्ने सहमति गरे। तर, प्रिज्माका अनुसार, सागरले व्यंग्य गर्दै आफ्ना कमेन्टहरू जारी राखे।

यस्तै, सागरले कला क्षेत्रमा उनीहरूलाई ‘काम नदिन’ भन्दै हिँडेको आरोप पनि उनले लगाएकी छन्।

प्रहरी कार्यालयमै झडप?

प्रिज्माले प्रहरी कार्यालयमै सागरले हातपात गर्न खोजेको दाबी गरेकी छन्। छलफलका लागि बोलाइएका बेला उनले प्रहरीकै अगाडि मुख छाड्दै हात उठाउन खोजेको आरोप लगाइन्।

अब के हुन्छ?

प्रिज्माले कानुनी उपचार खोज्ने बताएकी छन्। ‘पहिलो सम्झौतासमेत नमानेपछि अब कानुनी बाटोमा जान्छु,’ उनले भनिन्।

यो विवाद अझै गहिरिँदै गएको छ। अब सागरको प्रतिक्रिया के आउँछ? कानुनी कारबाही अगाडि बढ्छ कि मेलमिलाप हुन्छ? हेर्न बाँकी छ!