काठमाडौं । नेकपा एमालेले नेपाल–भारत सम्बन्धलाई अझ मजबुत बनाउन आफ्नो पार्टी र सरकार प्रतिबद्ध रहेको स्पष्ट पारेको छ। कुनै विषयमा असमझदारी देखिए कूटनीतिक माध्यमबाट समाधान गरिने र विकास साझेदारीलाई बलियो बनाइने एमाले महासचिव शंकर पोखरेलले बताएका छन्।

सोमबार एक विज्ञप्ति जारी गर्दै पोखरेलले परराष्ट्र नीति तथा बाह्य सम्बन्धजस्ता संवेदनशील विषयमा समाचार प्रकाशन वा टिप्पणी गर्नुअघि पार्टीको आधिकारिक धारणा बुझ्न सञ्चारमाध्यमहरूलाई आग्रह गरेका छन्।

उनले केही स्वदेशी तथा विदेशी सञ्चारमाध्यमहरूले एमाले अध्यक्ष तथा प्रधानमन्त्री केपी शर्मा ओलीको हालैको अभिव्यक्तिलाई तोडमोड गरी प्रचार गरेको आरोप लगाएका छन्।

‘यी समाचारले अनावश्यक सनसनी फैलाउने तथा नेपाल–भारतबीचको ऐतिहासिक सम्बन्धमा आशंका उत्पन्न गराउने दुराशय बोकेको देखिन्छ,’ विज्ञप्तिमा उल्लेख छ।

एमालेले नेपालको संविधान र लोकतान्त्रिक गणतन्त्र नेपाली जनताको सार्वभौम छनोट भएको भन्दै त्यसलाई परिवर्तन गर्ने कुनै पनि प्रयास सफल नहुने दाबी गरेको छ।

‘इतिहासलाई पछाडि फर्काउने प्रयासलाई नेपाली जनताले अस्वीकार गर्छन् भन्नेमा हामी विश्वस्त छौं,’ विज्ञप्तिमा भनिएको छ।

यसअघि केही सञ्चारमाध्यमहरूले ओलीले हालैको एमाले बैठकमा भारतीय खुफिया एजेन्सी ‘रअ’ ले आफूलाई हटाउन सक्रिय भएको भन्दै भारतलाई ‘देखाइदिने’ चेतावनी दिएको दाबी गरेका थिए। एमालेले भने ती समाचार आधारहीन रहेको स्पष्ट पारेको छ।