सुर्खेत - प्रधानमन्त्री केपी शर्मा ओलीले कर्णाली प्रदेशलाई विकट भन्नु गलत भएको बताएका छन्। उनका अनुसार, कर्णाली अब सम्भावनाको खानी हो, जहाँ तेलको अनुसन्धान भइरहेको छ।

मध्यपश्चिम विश्वविद्यालयको दीक्षान्त समारोहलाई सम्बोधन गर्दै ओलीले भने, "कर्णालीलाई विकट भनिन्छ, तर त्यो सत्य होइन। हामी यहाँ तेलको खोजी गरिरहेका छौं, भविष्यमा यहीँको तेल प्रयोग हुनेछ।"

उनले कर्णालीमा जडीबुटीको अपार सम्भावना रहेको तर त्यसको उचित उपयोग हुन नसकेको उल्लेख गरे। ओलीले देशको समृद्धिका लागि सकारात्मक सोच आवश्यक रहेको भन्दै भने, "नकारात्मकताले नेपाल अगाडि बढ्दैन, हामीलाई प्रगतिशील सोच चाहिन्छ। देश, जनता र मानवताको हितमा काम गर्नुपर्छ।"

साथै, दीक्षित विद्यार्थीहरूलाई उनले थप अध्ययन र अनुसन्धानमा लाग्न सुझाव दिए।

प्रधानमन्त्री केपी शर्मा ओली