काठमाडौं,  त्रिभुवन अन्तर्राष्ट्रिय विमानस्थलको मुख्य गेटमा सुरक्षामा कडाइ गरिएको छ। पूर्वराजा ज्ञानेन्द्र शाहको स्वागतको लागि तयार भएका राजावादी समर्थकहरूको भिड बढ्दै जाँदा, सुरक्षा प्रबन्धमा कडा कदम उठाइएको छ।

विमानस्थलको गोल्डेन गेटमा चक्रपथसँगै जोडिएको क्षेत्रमा जनपथ र सशस्त्र प्रहरीका तल्लो दर्जाका सुरक्षा कर्मचारीहरू तैनाथ गरिएको छ । उनीहरूले प्रत्येक व्यक्तिको चेकजाँच र सोधपुछ गरेपछि मात्र विमानस्थल परिसरमा प्रवेश गर्न दिईएको छ । 

तर, सुरक्षा कारणहरूले गर्दा केही मोटरसाइकलमा सवार व्यक्तिहरूलाई प्रवेश गर्न अनुमति दिइएन, र तिनीहरूलाई सुरक्षाकर्मीहरूले फर्काइदिएका छन्।

पूर्वराजा शाह पोखरामा एक हप्ता बसाई बिताएर आज काठमाडौं फर्किरहेका छन्। उनको स्वागतका लागि राप्रपा, राप्रपा नेपाल, शिव सेना नेपाल र अन्य राजावादी समूहका कार्यकर्ताहरू विमानस्थलको गेटसम्म पुगेका छन्। उनीहरूले राष्ट्रिय झण्डा र शाहको फोटो भएको ब्यानरसमेत ल्याएका छन्।

पूर्वराजा शाहको स्वागतका लागि बढ्दो भिडले सवारी आवागमनलाई प्रभावित बनाएको छ। सुरक्षा प्रबन्धलाई अझ कडा बनाउँदै, काठमाडौंको मुख्य सडकमा सुरक्षाकर्मीलाई हाई अलर्टमा राखिएको छ ।