काठमाडौं- गणतन्त्र र राष्ट्रियताको पक्षमा, संघीयता विरुद्धमा संघर्षरत राष्ट्रिय जनमोर्चाले राजधानी केन्द्रित साप्ताहव्यापी आन्दोलनको कार्यक्रम सार्वजनिक गरेको छ।

शुक्रबार राजधानीमा आयोजित पत्रकार सम्मेलनमार्फत पार्टीले आगामी चैत २४ गतेदेखि ३० गतेसम्म काठमाडौंका विभिन्न स्थानमा जुलुस, सभा, सांस्कृतिक कार्यक्रम र प्रचारात्मक अभियान सञ्चालन गरिने जानकारी दिएको हो।

कार्यक्रममा पार्टी अध्यक्ष चित्रबहादुर केसीले संघीयता नेपालको राष्ट्रियता र आर्थिक स्थायित्वका लागि ठूलो बोझ बनेको दाबी गर्दै यसलाई खारेज गर्नु अत्यावश्यक रहेको बताए। “गणतन्त्र नेपाली जनताको बलिदानी संघर्षको उपलब्धि हो, त्यसलाई जोगाउन संघीयता अन्त्य गर्नुपर्छ,” उनले प्रष्ट पारे।

पूर्वराजा ज्ञानेन्द्र शाहको अभिव्यक्ति, फागुन २५ को राजावादी प्रदर्शन र चैत १५ को हिंसात्मक घटनालाई प्रतिगमनको खतरा भन्दै केसीले देशभक्त, प्रगतिशील शक्तिहरूबीच सहकार्यको आवश्यकता औंल्याए।

राष्ट्रिय जनमोर्चाले गणतन्त्र जोगाउन संघीयताको अन्त्य आवश्यक भन्दै सुरु गर्न लागेको यो आन्दोलनले आगामी दिनमा कस्तो राजनीतिक प्रभाव पार्ने हो, त्यसतर्फ सबैको नजर केन्द्रित छ।