काठमाडौं -  काठमाडौं महानगरपालिकाका प्रमुख प्रशासकीय अधिकृत सरोज गुरागाईंले आजदेखि औपचारिक रूपमा काम थालनी गरेका छन्। मेयर बालेन्द्र साह (बालेन) को प्रतिरोधका बाबजुद वडाध्यक्ष, कार्यपालिका सदस्य र कर्मचारीहरूको समर्थनमा गुरागाईं कार्यकक्षमा प्रवेश गरेका हुन्।

गुरागाईंको प्रवेशसँगै मेयर बालेन भने अझै बेपत्ता छन्। महानगरका प्रवक्ता नवीन मानन्धरले मेयरसँग हिजोदेखि सम्पर्क नभएको पुष्टि गरेका छन्। “प्रमुख प्रशासकीय अधिकृतले काम थाल्नुभयो, तर मेयर कहाँ हुनुहुन्छ भन्ने थाहा छैन,” उनले भने।

गुरागाईंले तीन महिनादेखि रोकिएको कर्मचारी तलब प्रक्रिया अगाडि बढाइसकेका छन्। कार्यालयको प्रवेशमा नगर प्रहरी, कार्यकक्षमा तालाबन्दी, र सवारीमा ह्विललक लगाएर मेयर बालेन बाहिरिएको सूचना रहेको छ। हिजो मात्र उनी पाँचखालस्थित एक होटलमा देखिएका थिए। उपमेयर सुनिता डंगोलले उनलाई ‘तमासा नगर्न’ भन्दै स्पष्ट सन्देश दिइसकेकी छन्।

वडाध्यक्षहरू र कर्मचारीहरू बालेनसँग असन्तुष्ट देखिएका छन्। वडाध्यक्ष चिनीकाजी महर्जनले मेयरले ‘अभिभावकको भूमिका’ निर्वाह गर्न नसकेको आरोप लगाउँदै भने, “गल्ती गर्नेप्रति कारबाहीका लागि आयोग छ, तर मेयरले कानुन नै हातमा लिएका छन्।”

महर्जनको भनाइमा थप कटाक्ष यस्तो थियो:
“उहाँ साउथ इण्डियन मुभी जसरी इन्काउंटर दिन चाहनुहुन्छ। तर यो महानगर हो, फिल्म होइन।”

अब वडाध्यक्षहरूले मेयरसँग संयुक्त छलफल (टेबल टक) गर्ने तयारी गरेका छन्। मेयर कार्यालय नफर्किएसम्म प्रशासनिक गतिरोध जारी रहने संकेत देखिएको छ।