काठमाडौं  -  प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच थाइल्याण्डको राजधानी बैंककमा शुक्रबार अपराह्न महत्वपूर्ण भेटवार्ता सम्पन्न भएको छ। बङ्गालको खाडीको प्रयास (बिम्स्टेक) को छैटौं शिखर सम्मेलनको अवसरमा भएको यो भेटपछि भारतीय प्रधानमन्त्री मोदीले सामाजिक सञ्जालमार्फत प्रतिक्रिया दिएका छन्।

"प्रधानमन्त्री केपी शर्मा ओलीसँग बैंककमा भेटवार्ता फलदायी भयो," मोदीले फेसबुकमा तस्बिरसहित लेख्दै थपे, "हामीले भारत–नेपाल सम्बन्धका विभिन्न पक्षहरूमा छलफल गर्‍यौं।"

भेटमा दुई नेताबीच कनेक्टिभिटी, ऊर्जा, सूचना प्रविधि, विपद् व्यवस्थापन, समुद्री यातायात लगायत विविध क्षेत्रहरूमा सहकार्यका सम्भावनाहरू माथि कुराकानी भएको भारतीय पक्षले जनाएको छ।

प्रधानमन्त्री ओली गत मंगलबार थाइल्याण्डको औपचारिक भ्रमण तथा बिम्स्टेक सम्मेलनमा भाग लिन बैंकक पुगेका थिए। सो क्रममा उनले अन्य राष्ट्र प्रमुखहरूसँग पनि उच्चस्तरीय भेटवार्ता गरेका छन्।

यसअघि पनि ओली र मोदीबीच गत असोज ७ गते अमेरिका, न्युयोर्कमा संयुक्त राष्ट्रसंघ महासभाको क्रममा ‘साइडलाइन’ भेट भएको थियो। सो भेट मोदी बसेकै होटल लोटे न्युयोर्क प्यालेसमा करिब ३० मिनेट भएको थियो।

भारत–नेपाल सम्बन्धमा चलिरहेको उतारचढावबीच बैंककको यो भेटले दुई मुलुकबीचको सम्बन्धलाई पुनः तातो बनाउने संकेत देखिएको छ।