काठमाडौं, चैत २२ — गृहमन्त्री रमेश लेखकले तीनकुनेमा राजावादीहरुले चैत १५ गते आयोजना गरेको प्रदर्शनबारे गम्भीर आरोप लगाएका छन्। शुक्रबार सिंहदरबारस्थित राज्य व्यवस्था तथा सुशासन समितिको बैठकमा बोल्दै उनले सो प्रदर्शन संविधान उल्ट्याउने र गणतान्त्रिक व्यवस्था समाप्त पार्ने उद्देश्यले गरिएको दाबी गरे।

गृहमन्त्रीका अनुसार, प्रदर्शन शान्तिपूर्ण भनेर अनुमति लिइए पनि त्यसको व्यवहारिक स्वरूप पूर्णरूपमा फरक देखियो। निजी सम्पत्तिमा तोडफोड, आगजनी, अमर्यादित र हिंसात्मक गतिविधिहरूले प्रदर्शनको वास्तविक उद्देश्य प्रष्ट भएको उनले बताए।

"यो कुनै सामान्य आन्दोलन थिएन," गृहमन्त्रीको चेतावनी, "यो संविधानको जरोमा प्रहार गर्न खोजिएको प्रयास थियो।"

पूर्वराजा ज्ञानेन्द्र शाहको अभिव्यक्ति, फागुन २५ को प्रदर्शन, र राजावादी नेताहरूका टिप्पणीहरुलाई सँगै जोडेर हेर्दा यो कुनै संयोग नभएको स्पष्ट देखिने उनको दाबी छ। उनले थपे, “राजावादी नेताहरुको भाषा, उनीहरूद्वारा गरिएको सार्वजनिक टिप्पणी, र नेताहरू लुक्ने ठाउँ खोज्दै छौं भन्ने धम्कीपूर्ण अभिव्यक्तिले उनीहरू संविधानको अन्त्य गर्ने योजनामा लागेको पुष्टि हुन्छ।”

लेखकले जोड दिँदै भने, "यदि हामीले यो प्रदर्शनलाई केवल सरकारप्रति असन्तुष्टि प्रकट गर्ने शान्तिपूर्ण प्रयास ठानेका छौं भने त्यो ठुलो भ्रम हुनेछ। यसको वास्तविक उद्देश्य नै संविधान र संघीय लोकतान्त्रिक गणतन्त्रात्मक शासनको समाप्ति हो।"

गृहमन्त्रीको यो चेतावनीसँगै अब सरकार र सुरक्षा संयन्त्र यस्ता गतिविधिहरुप्रति कति संवेदनशील र सतर्क हुने हो, त्यो चासोको विषय बनेको छ।

गृहमन्त्री रमेश लेखक