पाकिस्तानस्थित आतंकी संगठन जैश-ए-मोहम्मद (JeM) फेरि एकपटक दक्षिण एशियाली सुरक्षा बहसको केन्द्रमा आएको छ। लामो समयदेखि भारतविरुद्ध आतंकी हमला गरिरहेको यो संगठन अझैसम्म पाकिस्तानमा खुला रूपमा गतिविधि गरिरहेको रिपोर्टहरूले देखाउँछ। विडम्बना के छ भने—सरकारी नियन्त्रण र अन्तर्राष्ट्रिय प्रतिबन्धका बाबजुद पनि JeM निरन्तर सक्रिय छ, र यसले क्षेत्रीय स्थिरतामाथि गहिरो खतरा उत्पन्न गरिरहेको छ।

JeM को स्थायी उपस्थिति पाकिस्तानको पंजाब प्रान्तमा अझै देखिन्छ। संगठनका प्रमुख मसूद अज़हरको गतिविधिमा प्रतिबन्ध लगाइए पनि, उनी अनौपचारिक रूपमा संगठन सञ्चालन गरिरहेको विश्वास गरिन्छ। भारतीय सुरक्षा एजेन्सीहरूका अनुसार JeM ले न केवल कश्मीरमा आक्रमणको तयारी गरिरहेको छ, तर तालिम शिविरहरूमा नयाँ लडाकुहरूको भर्ती समेत तीव्र बनाएको छ।

विगतमा भारतका संसद हमला, पठानकोट एयरबेस हमला, र पुलवामा आत्मघाती विस्फोटजस्ता घटनामा संलग्न रहेको JeM ले आतंकी गतिविधिहरूलाई वैचारिक आडमा निरन्तरता दिइरहेको छ। यस्ता गतिविधिहरू पाकिस्तानको आतंकवाद प्रतिवद्धता माथि गम्भीर प्रश्न उठाउँछन्।

अन्तर्राष्ट्रिय समुदायले JeM विरुद्ध कार्यवाही गर्न पाकिस्तानलाई पटक–पटक दबाब दिए पनि ठोस नतिजा आएको छैन। फाइनान्सियल एक्सन टास्क फोर्स (FATF) लगायतका निकायहरूले पाकिस्तानको भूमिकालाई ‘आंशिक सहकार्य’ मात्र मानेका छन्। यसले पाकिस्तानको अन्तर्राष्ट्रिय छविमा नकारात्मक प्रभाव परेको छ।

JeM को अस्तित्व केवल भारतको आन्तरिक सुरक्षाको विषय होइन, यो सम्पूर्ण दक्षिण एसियाको राजनीतिक स्थायित्व र आतंकवाद विरोधी प्रयासको सन्दर्भमा गम्भीर चुनौती बनेको छ। जबसम्म यस्तो संगठनलाई पूर्णरूपमा निस्तेज गरिँदैन, तबसम्म शान्ति केवल एक भ्रममै सीमित रहनेछ।