राष्ट्रिय परिचयपत्र सबै नेपाली नागरिकका लागि अनिवार्य गरिएको छ। तर, धनकुटा जिल्लामा परिचयपत्र वितरण प्रक्रिया सुस्त बनेको देखिएको छ। जिल्ला प्रशासन कार्यालय, धनकुटाका अनुसार हालसम्म थुप्रै परिचयपत्र कार्यालयमै थन्किएको अवस्थामा छन्।

गत असार मसान्तसम्म जिल्लामा ४२ हजार नागरिकले राष्ट्रिय परिचयपत्रका लागि फारम भरेका थिए। तीमध्ये २० हजार ४२५ जनाको परिचयपत्र छापिएर कार्यालयमा आइपुगेको छ। तर, अहिलेसम्म जम्मा ४ हजार सेवाग्राहीले मात्र परिचयपत्र बुझेका छन्। बाँकी १५ हजार ५२५ परिचयपत्र वितरण गर्न बाँकी रहेको जिल्ला प्रशासन कार्यालयका सूचना अधिकारी खगेन्द्र सुवेदीले जानकारी दिनुभयो।

वितरणमा ढिलाइ हुनुका कारण सेवाग्राही स्वयं आएर कार्ड नलिएको प्रमुख कारण हो। परिचयपत्र आएर लामो समय थन्किए पनि सेवाग्राही उपस्थित नभएको कार्यालयले जनाएको छ। यस सम्बन्धमा जानकारीका लागि पटक–पटक सूचनासमेत प्रकाशित गरिएको भए पनि नागरिकहरूको उपस्थिति न्यून देखिएको छ।

हाल कार्यालयमा दैनिक ६०–६५ जनाले राष्ट्रिय परिचयपत्रको फारम भर्दै आएका छन्। यसैगरी, दैनिक झण्डै ३ सय सेवाग्राही विभिन्न कामका लागि प्रशासन कार्यालय आउने गरेका छन्। तीमध्ये सबैभन्दा धेरै राष्ट्रिय परिचयपत्र, त्यसपछि राहदानी, नागरिकता, र नागरिकता प्रतिलिपिका लागि सेवाग्राही आउने गरेको कार्यालय स्रोतले जनाएको छ।

स्थानीय प्रशासनले सेवाग्राहीलाई आवश्यक कागजात लिएर चाँडोभन्दा चाँडो राष्ट्रिय परिचयपत्र बुझ्न अनुरोध गरेको छ। यदि सेवा नलिएर थन्किँदा परिचयपत्रको दुरुपयोग हुने जोखिमसमेत बढ्ने अधिकारीहरू बताउँछन्।