सामाजिक सुरक्षा भत्ता नवीकरणका लागि लाभग्राही स्वयं पालिका वा वडा कार्यालयमा उपस्थित हुनुपर्ने अनिवार्य प्रावधान छ । तर, अशक्त, ज्येष्ठ नागरिक र अपाङ्गता भएका लाभग्राहीका लागि यो प्रक्रिया कठिन भएको महसुस गर्दै प्युठानका विभिन्न पालिकाका जनप्रतिनिधिहरु घरघरमै पुगेर नवीकरणको काममा सक्रिय भएका छन् ।

स्वर्गद्वारी नगरपालिका–५ का वडा अध्यक्ष गिरबहादुर घर्तिमगरका अनुसार टोल, बस्ती र घरमै पुगेर बिहानदेखि साँझसम्म सामाजिक सुरक्षा भत्ता नवीकरण गरिँदैछ । “शनिवारको दिनसमेत हामी यही अभियानमा खटिएका छौं,” उहाँले भन्नुभयो, “सर्भर डाउन हुने, कार्यालयसम्म पुग्न गाह्रो हुने समस्याका कारण यो विकल्प रोजिएको हो ।”

माण्डवी गाउँपालिका–३ का वडा अध्यक्ष धनेन्द्र कार्कीले साउन ७ गतेदेखि १३ गतेसम्म वडाका सात स्थानमा पुगेर सेवा दिएको जानकारी दिनुभयो । “यसरी टोलटोलमै पुग्दा नागरिकलाई अत्यधिक राहत पुगेको छ,” उहाँले भन्नुभयो ।

त्यस्तै, गौमुखी गाउँपालिका–४ पुँजाका वडा अध्यक्ष धनिराम सुनार र उपाध्यक्ष महावीर रानासमेत नवीकरणका काममा गाउँटोलमै सक्रिय छन् । उपाध्यक्ष रानाका अनुसार अनिवार्य राष्ट्रिय परिचयपत्र र स्वयं उपस्थित हुनुपर्ने जस्ता प्रावधानले विशेष अवस्थामा रहेका नागरिकलाई असहज बनाएको थियो, जसको समाधानका लागि वडाबाटै सेवा दिने व्यवस्था मिलाइएको हो ।

यो घरमै पुग्ने सेवा अभियानले नवीकरण प्रक्रियालाई सरल बनाएको छ र सामाजिक सुरक्षाको पहुँचलाई अझ प्रभावकारी ढंगले विस्तार गरेको छ।