रुपन्देहीको मर्चवारी गाउँपालिका–३ का वडाध्यक्ष जनार्दन यादवसहित दुई जनाविरुद्ध तीन लाख रुपियाँ घुस लिएको अभियोगमा अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ।

आयोगका प्रवक्ता राजेन्द्रकुमार पौडेलका अनुसार आर्थिक वर्ष २०८१/८२ मा सञ्चालित सिसु सेमरा दक्षिण धोबहिया छठघाट निर्माण, पूर्निकोट गाउँभित्र सडक पीसीसी ढलान, र सुरहवाँ गाउँभित्र सडक पीसीसी ढलान योजनाका काम सम्पन्न भएपछि सिफारिस दिने प्रयोजनमा सेवाग्राहीसँग तीन लाख रुपियाँ घुस मागिएको पुष्टि भएको हो।

वडाध्यक्ष यादवले उक्त घुस रकम गणेश ट्रेडिङका सञ्चालकका छोरा विपिनकुमार पाण्डेयमार्फत लिन लगाएको आयोगको दाबी छ। पाण्डेयले मतियारको भूमिका निर्वाह गर्दै भ्रष्टाचारजन्य कार्यमा सहकार्य, सहजीकरण र सघाउने भूमिका खेलेको ठहर गरिएको छ।

आयोगले भ्रष्टाचार निवारण ऐन, २०५९ को दफा २२ बमोजिम बिगो रकम तीन लाख रुपियाँ कायम गरी, प्रतिबन्धात्मक वाक्यांश अनुसार मुख्य कसुरदार सरहको सजाय माग गर्दै सोमबार विशेष अदालत काठमाडौंमा आरोपपत्र दायर गरेको जानकारी दिएको छ।