पछिल्ला १२ घण्टामा पश्चिम नेपालका दाङ, बाँके र बर्दिया जिल्लामा अत्यधिक वर्षा भएको छ, जसले ती क्षेत्रहरूमा डुबान र आकस्मिक बाढीको जोखिम बढाएको छ। जल तथा मौसम विज्ञान विभागका अनुसार दाङको जलकुण्डी मापन केन्द्रमा २२७ मिमी, बाँकेको सिक्टामा २०० मिमी र बर्दियाको मानपुरमा १६७ मिमी वर्षा भएको छ।

दाङमा पछिल्लो एक घण्टामै २५ मिमीभन्दा बढी वर्षा मापन गरिएको छ, जसलाई विभागले 'अति भारी वर्षा' को श्रेणीमा राखेको छ। बाँकेमा पनि अति भारी र बर्दियामा धेरै भारी वर्षा भएको पुष्टि गरिएको छ।

मौसमविद् हरिप्रसाद दाहालले जानकारी दिएअनुसार, आज दिउँसो र रातिको समयमा पश्चिम नेपालमा अझै बढी पानी पर्ने पूर्वानुमान गरिएको छ। यद्यपि अन्य प्रदेशहरूमा पनि एकदुई स्थानमा भारी वर्षाको सम्भावना रहेको छ। मनसुन न्यून चापीय प्रणालीको असर देशभर सक्रिय रहँदा मौसम अझै केही दिन यस्तै रहने देखिएको छ।

छ घण्टाभित्र दाङको तुलसीपुर, अम्बापुर, जलकुन्डी, बाँकेको पश्चिम राप्ती र सिक्टा, तथा बर्दियाको मानपुर क्षेत्र आसपास भारी वर्षा मापन भएको छ। यी क्षेत्रबाट बहने बबई, पश्चिम राप्ती, डुडुवा खोलालगायतका नदी र खोलामा आकस्मिक बाढी आउन सक्ने खतरा बढेकाले बाढी पूर्वानुमान महाशाखाले स्थानीय बासिन्दालाई सतर्क रहन अनुरोध गरेको छ।

हाल देशभर मनसुनी वायुले प्रभाव जमाएको छ र मनसुनको न्यूनचापीय रेखा नेपालको तराई क्षेत्रमा अवस्थित छ। देशभर व्यापक बदली रहेको र लुम्बिनी, कर्णाली, सुदूरपश्चिमलगायत धेरै क्षेत्रमा हल्कादेखि मध्यम वर्षा जारी रहेको महाशाखाले जनाएको छ। अर्काे २४ घण्टा विशेष संवेदनशील रहने भन्दै विभागले विशेष सतर्कता अपनाउन आग्रह गरेको छ।