सोमबार रातिदेखिको अविरल वर्षाले बर्दीबास–५ स्थित पूर्व–पश्चिम लोकमार्गमा पर्ने लचका बगाउँदा मङ्गलबार बिहानदेखि सवारी आवागमन पूर्ण रूपमा ठप्प भएको छ।

इलाका प्रहरी कार्यालयका डिएसपी विकास बमका अनुसार बिहान पौने ८ बजेतिर जङ्गली क्षेत्रबाट तीव्र गतिमा आएको वर्षे भलले करिब ३० फिट सडक कटान गर्नुका साथै लचकामा रहेको ह्युमपाइपसमेत बगाएको हो। यससँगै पूर्व–पश्चिम यातायात पूर्णरूपमा बन्द छ।

सडक कटान र पानीको तेज बहावका कारण यात्रु र सवारी साधनहरू जङ्गली क्षेत्रमा अलपत्र परेका छन्। मौसम अझै प्रतिकूल रहेकाले कति बेला सडक खुल्ला हुन्छ भन्ने अनिश्चित रहेको ट्राफिक निरीक्षक लक्ष्मीराज जोशीले जानकारी दिनुभयो।

कतिपय हतारमा रहेका सवारी साधनहरू करिब ४० किलोमिटर लामो घुमाउरो बाटो समातेर गौशाला रोड हुँदै लक्ष्मिनियाँ चोकबाट गन्तव्यतर्फ लागेका छन्।

यात्रुहरूलाई राहत दिने प्रयासस्वरूप निर्माणाधीन कल्भर्ट निर्माण गरिरहेको चिनियाँ ठेकेदार शान्ति तथा रसुवागढी ज्वाइन्ट भेन्चर ले डोजर प्रयोग गरेर पैदल यात्रुहरूलाई सडकको अर्को छेउमा पुर्‍याइरहेको छ। सोही कम्पनीले बगाएको ह्युमपाइप फेरी जडान गरी बाटो खुलाउने प्रयास पनि गरिरहेको छ।