संयुक्त राष्ट्र बाल कोष  ले गाजामा इजरायली बमबारी, भोकमरी र कुपोषणका कारण दैनिक झन्डै २८ बालबालिकाको मृत्यु भइरहेको खुलासा गरेको छ। युद्धले छ सय ६० दिन पार गरिसकेको गाजामा बालबालिकाको दयनीय अवस्था युनिसेफको पोस्टले झल्काएको हो।

“बमबारीबाट मृत्यु,कुपोषण र भोकमरीबाट मृत्यु,सहायता र आधारभूत सेवाको अभावमा मृत्यु,” युनिसेफले एक्स (पूर्व ट्विटर) मा लेखेको छ, “गाजामा दैनिक औसत २८ बालबालिकाको ज्यान गइरहेको छ — जुन संख्या एउटा कक्षाकोठा बराबर हो।”

एजेन्सीले गाजाका बालबालिकालाई खाना, सफा पानी, औषधि र सुरक्षाको अत्यावश्यक आवश्यकताको उल्लेख गर्दै सबैभन्दा पहिला युद्धविराम अपरिहार्य भएको बताएको छ। मार्च २ देखि इजरायली सेनाले गाजासँगका सबै सीमा नाकाहरू बन्द गर्दै मानवीय सहायता प्रवेशमा अवरोध पुर्‍याएको छ।

नाकाहरू बन्द भएसँगै गाजामा भोकमरी चरम अवस्थामा पुगेको र मानिसहरू जीवन र मृत्युसँग संघर्ष गरिरहेको युनिसेफको भनाइ छ। यसअघि विश्व खाद्य कार्यक्रम (WFP) ले पनि गाजामा अनिकालको अवस्था उत्पन्न भइसकेको चेतावनी दिएको थियो।

मानवअधिकार समूहहरूले इजरायलको यो नाकाबन्दीलाई ‘मानव निर्मित अकाल’ भनेका छन्।