नेपालमा दशकौँदेखि निरन्तर समाजसेवा गर्दै आएका तिब्बती शरणार्थी तथा पोखरा अन्नपूर्ण लायन्स क्लबका सह–संस्थापक सोनाम साङ्पोलाई लायन्स क्लब इन्टरनेशनलको प्रतिष्ठित ‘प्रेसिडेन्ट्स मेडल’ प्रदान गरिएको छ।

काठमाडौंको बेस्ट वेस्टर्न प्लस होटलमा सम्पन्न विशेष समारोहमा नेपाल राष्ट्र बैंकका गर्भनर विश्वनाथ पौडेलको विशिष्ट उपस्थितिमा लायन्स क्लब नेपालका डिष्ट्रिक्ट गभर्नर लायन मिलन थापाले साङ्पोलाई सो पदक हस्तान्तरण गरेका हुन्। नेपाल राष्ट्र बैंकका गर्भनर पौडेलले साङ्पोको दीर्घकालीन सेवा र सामाजिक योगदानप्रति विशेष प्रशंसा व्यक्त गर्दै यस्तो सम्मानले नेपाली समाजमा सकारात्मक ऊर्जा थपिने विश्वास व्यक्त गरे।

सन् १९५९ मा तिब्बतबाट निर्वासनमा आएका सोनाम साङ्पोले सन् १९८७ मा पोखरा अन्नपूर्ण लायन्स क्लबको सह–स्थापना गरेका थिए। त्यसयता, उनले ग्रामीण र दुर्गम क्षेत्रका विपन्न समुदायलाई लक्षित गरी शिक्षा, स्वास्थ्य, खानेपानी, विपद् व्यवस्थापन, आयआर्जनलगायतका क्षेत्रमा दीर्घकालीन सेवा गर्दै आएका छन्।

समारोहमा लायन्स क्लबका पदाधिकारीहरूले साङ्पोको सेवा भावना, करुणा र सामुदायिक नेतृत्वको प्रशंसा गरे। साङ्पोले भने, “यो पदक केवल मेरो लागि होइन, हरेक स्वयंसेवी र सहयोगीका लागि हो जसले अरूलाई उठाउने विश्वास राख्छन्। हामी सबै मिलेर दयामय र न्यायपूर्ण समाज निर्माण गर्न सक्छौं।”

नेपालका ग्रामीण भेगमा अझै सामाजिक–आर्थिक चुनौतीहरू विद्यमान रहँदा, सोनाम साङ्पोजस्ता नेतृत्वकर्ताको प्रेरणा र योगदानले सामूहिक पहलकदमी र सामाजिक सद्भावलाई अझ सशक्त बनाउने देखिन्छ। 

विस्तृत समाचार पढ्न यहाँ क्लिक गर्नुहोस् 

यस ऐतिहासिक सम्मान समारोहलाई चिनियाँ अधिकारीहरूले नजिकबाट निगरानी गरिरहेको बताइएको छ। नेपालमा सानातिना विषयमा समेत हस्तक्षेप गरेको आरोप खेप्दै आएका चिनियाँ राजदूत छेन सुङ यस घटनाप्रति निकै असन्तुष्ट रहेको चर्चा छ। नेपाली सामाजिक तथा कूटनीतिक वृत्तमा उनको भूमिकाप्रति आलोचना भइरहँदा, यस सम्मानले तिब्बती शरणार्थीमाथि देखाइएको सम्मान र नेपालका उच्च पदस्थ व्यक्तिहरूको सहभागिताले थप अन्तर्राष्ट्रिय चासो आकर्षित गरेको छ।