गत दुई दिनदेखि परेको अविरल वर्षापछि बाँकेको पश्चिम राप्ती नदीमा जलसतह चेतावनी तह पार गर्दै उच्च जोखिममा पुगेको छ। जिल्ला विपद् व्यवस्थापन समिति बाँकेले राप्ती सोनारी जलमापन केन्द्रका आधारमा डुबान हुन सक्ने क्षेत्रका स्थानीयवासीलाई सतर्क रहन आग्रह गरेको छ।

सूचना व्यवस्थापन अधिकृत रुपन ज्ञवालीका अनुसार, राप्ती सोनारी जलमापन केन्द्रमा चेतावनी तह ४.७० मिटर पार गरेर हाल ४.८६ मिटर पुगेको छ। साथै कुसुम जलमापन केन्द्रमा पनि सतह ५.७४ मिटर पुगेको छ, जहाँ ६ मिटर पुग्नासाथ चेतावनी तह पार हुने मानिन्छ।

ज्ञवालीले नदी वरपरका सबै गाउँबस्तीलाई बाढीको उच्च जोखिममा रहेको भन्दै स्थानिय विपद् व्यवस्थापन समिति, सुरक्षा निकाय र बासिन्दालाई पूर्ण तयारी अवस्थामा रहन निर्देशन दिइएको जानकारी दिनुभयो।

राप्ती नदी बग्ने प्राकृतिक मार्गमा भारतले एकतर्फी रूपमा बनाएको लक्ष्मणपुर बाँध र कलकलवा तटबन्धले नेपाली भूभागमा डुबानको खतरा झनै बढाएको छ। यो वर्ष पनि राप्तीसोनारी, डुडुवा र नरैनापुर गाउँपालिकाका तटीय क्षेत्रका बासिन्दा डुबानको उच्च जोखिममा परेका छन्। दाङ, रोल्पा, प्यूठान लगायतका जिल्लामा लगातारको वर्षाले राप्ती नदीमा पानीको बहाव झनै बढाएको छ। नदीको बहाव बढेसँगै मंगलबार बिहानदेखि जलसतह क्रमिक रूपमा उकालो लागेको बताइएको छ।

 बाँकेको दर्जनौं गाउँबस्ती अहिले बाढीको उच्च जोखिममा छन्। सरकारले सतर्कता सूचना जारी गरेसँगै सबै तहका सरकारी र गैरसरकारी निकायले तत्परता अपनाउनुपर्ने अवस्था छ। बासिन्दालाई सुरक्षित स्थानमा सर्ने, अत्यावश्यक सामग्री तयारी राख्ने, र आपत्कालीन सूचना सुन्न सचेत रहन अपील गरिएको छ।