कर्णाली प्रदेश सरकारको मन्त्रिपरिषद् बैठकले प्रदेशसभाको छैटौँ अधिवेशन आज राति १२ बजेदेखि अन्त्य गर्न सिफारिस गर्ने निर्णय गरेको छ। मुख्यमन्त्री राजकुमार शर्मा नेतृत्वको मन्त्रिपरिषद्को बैठक बुधबार बिहान बसेको हो।

बैठकले मुख्यमन्त्री तथा मन्त्रिपरिषद्को कार्यालयमा कार्यरत प्रदेश सचिव ढोलकराज ढकाललाई सरुवा गरी सामाजिक विकास मन्त्रालयमा सचिवका रूपमा खटाउने निर्णय गरेको छ। ढकाल यसअघि सोही कार्यालयमा कार्यरत रहनुभएको थियो।

यस्तै, सर्वोच्च अदालतको २०८२ जेठ ७ गतेको परमादेश अनुसार जाजरकोटको जुनिचाँदे गाउँपालिकाको प्रशासनिक केन्द्र गाउँपालिका–४ लुहादहमा तोक्न नेपाल सरकारसमक्ष सिफारिस गर्ने निर्णय पनि बैठकले गरेको छ।

प्रदेश सरकारले पत्रकारिता क्षेत्रको सशक्तीकरणका लागि ‘पत्रकारिता पुरस्कार वितरण कार्यविधि, २०८२’ स्वीकृत गरेको छ। उक्त कार्यविधिबाट योग्य पत्रकारलाई सम्मान र प्रोत्साहन दिने नीति अवलम्बन गरिनेछ।

साथै, सूचनाको हकसम्बन्धी कार्यान्वयनको प्रभावकारिता मूल्याङ्कन गर्न शासकीय सुधार महाशाखाका सचिवको संयोजकत्वमा ‘कर्णाली प्रदेश सूचनाको हक अनुगमन समिति’ गठन गरिएको छ। उक्त समितिले सूचनाको हक सम्बन्धी कानुन कार्यान्वयन भएको नहुनुका पक्षमा प्रदेशभरका कार्यालयमा अनुगमन गर्नेछ।