सरकारले उखुमा दिँदै आएको अनुदान कटौती गरेपछि आक्रोशित उखु किसानहरूले बुधबार महोत्तरीको रामनगरस्थित एभरेष्ट चिनी मिल गेटमा टायर बालेर विरोध प्रदर्शन गरेका छन्।

उखु उत्पादक कृषक संघ महोत्तरीको अगुवाइमा गरिएको प्रदर्शनमा किसानहरूले "किसानको माग पूरा गर", "उखुको अनुदान फिर्ता गर", "झुठो आश्वासन चाहिँदैन", जस्ता नारा लगाउँदै सरकारको निर्णयको विरोध जनाएका हुन्।

यसअघि साउन १८ गते किसानहरूले प्रमुख जिल्ला अधिकारीमार्फत सरकारलाई ज्ञापनपत्र बुझाएका थिए।

सरकारले चालु आर्थिक वर्ष २०८२/८३ को बजेटमार्फत प्रति क्विन्टल ७० रुपैयाँ दिँदै आएको अनुदान कटौती गरेपछि किसानहरू आन्दोलित भएका हुन्।

प्रदर्शनस्थलमा बोल्दै उखु उत्पादक कृषक संघ महोत्तरीका अध्यक्ष नरेशसिंह कुशवहाले अनुदान कटौती किसानमाथिको ठुलो अन्याय भएको बताउँदै भन्नुभयो, "मूल्य पनि नबढाउने, अनुदान पनि कटौती गर्ने? यस्तो नीतिले किसानलाई खेती त्याग्न बाध्य बनाउँछ।"

उहाँले थप्नुभयो, "७० रुपैयाँले उखु किसानलाई सानो भए पनि राहत मिल्थ्यो। त्यो अनुदानले खेतीप्रति केही भरोसा र उत्साह कायम थियो। अब त्यो पनि खोसियो।"

 उखु उत्पादक कृषक महासंघका केन्द्रीय सदस्य महाशङ्कर थिङले महोत्तरीका मात्र १४ हजार ५३३ किसान प्रत्यक्ष असरमा परेको जानकारी दिनुभयो। उहाँले भन्नुभयो, "सरकारले राज्यकोषबाट अनुदान दिने हैन। उखुबाट उठ्ने वार्षिक तीन अर्बभन्दा बढी भ्याटबाट सरकारलाई राजस्व आउँछ, त्यसैको एक सानो भाग किसानलाई दिनुपर्ने हो।

" थिङले कटौती गरिएको ७० रुपैयाँ कुनै ‘दया’ नभई किसानको हक भएको जिकिर गर्दै तुरुन्त फिर्ता गर्न सरकारसँग माग गर्नुभयो।

कार्यक्रममा बोल्दै किसान तथा लोसपाका नेता देवनारायण महतोले मलखादको अभाव, उत्पादन लागत वृद्धि, र मूल्य स्थिरताको समस्याबीच अनुदान कटौती गर्नु अन्यायपूर्ण भएको टिप्पणी गर्नुभयो।

उखु किसानहरुले भदौ ८ गतेदेखि काठमाडौं केन्द्रित आन्दोलन गर्ने चेतावनी दिएका छन्। यदि तत्काल माग सम्बोधन भएन भने आन्दोलनको स्वरूप अझ तीव्र पारिने उनीहरूको भनाइ छ।