नेकपा (एमाले)ले आगामी भदौ २० देखि २२ गतेसम्म ललितपुरको गोदावरीस्थित सन्राइज इन्टरनेशनल कन्भेन्सन सेन्टरमा आयोजना गर्न लागेको दोस्रो विधान महाधिवेशनमा चारवटा प्रमुख कार्यसूचीमा केन्द्रित छलफल हुने भएको छ।

एमाले प्रचार विभाग प्रमुख राजेन्द्र गौतमका अनुसार महाधिवेशनमा निम्न विषयहरूमा प्रतिवेदन प्रस्तुत हुनेछ: राजनीतिक प्रतिवेदन – अध्यक्ष एवं प्रधानमन्त्री केपी शर्मा ओली,विधान संशोधन प्रस्ताव – उपाध्यक्ष तथा अर्थमन्त्री विष्णुप्रसाद पौडेल, साङ्गठनिक प्रतिवेदन – महासचिव शङ्कर पोखरेल ,सल्लाहकार परिषद् र आयोगहरूको प्रतिवेदन – केन्द्रीय अनुशासन आयोग – अध्यक्ष केशव बडाल,लेखा आयोग – अध्यक्ष डा. पुष्प कँडेल,निर्वाचन आयोग – अध्यक्ष डा. विजय सुब्बा,सल्लाहकार परिषद् – अमृतकुमार बोहरा महाधिवेशनमा प्रस्तुत गरिने विधान संशोधन प्रस्तावलाई अन्तिम रूप दिन पार्टीले सचिवालय, पोलिटब्युरो र केन्द्रीय कमिटीमा छलफल गरिसकेको छ।

यस मस्यौदालाई देशभरिका मातहतका कमिटीहरूमा पठाएर सुझाव मागिएको थियो। प्राप्त सुझावको आधारमा उपाध्यक्ष पौडेल नेतृत्वको समितिले मस्यौदालाई अन्तिम रूप दिनेछ।

महाधिवेशन प्रचारका लागि केन्द्रीय प्रचार विभाग प्रमुख तथा स्थायी कमिटी सदस्य राजेन्द्र गौतमको संयोजकत्वमा प्रचार उपसमिति गठन गरिएको छ। सदस्यहरूमा गणेश बस्नेत, गणेश पाण्डे, श्रीधर आचार्य, चेतन अधिकारी, दीपक ज्ञवाली, र विश्वमणि सुवेदी रहेका छन्।