इटाली सरकारले सिसिली टापुलाई मुख्य भूमिको क्यालाब्रिया क्षेत्रसँग जोड्ने गरी विश्वकै सबैभन्दा लामो झोलुङ्गे पुल निर्माण गर्ने परियोजनालाई अन्तिम स्वीकृति दिने तयारी गरेको छ। यो परियोजनाको अनुमानित लागत १३ अर्ब ५० करोड युरो (अन्दाजी १५ अर्ब ६० करोड अमेरिकी डलर) रहेको छ।

बुधबार हुने मन्त्रिपरिषद् बैठकमा उक्त परियोजनालाई समर्थन गरिने उपप्रधानमन्त्री तथा पूर्वाधारमन्त्री माटेओ साल्भिनीले जानकारी दिनुभयो। उहाँले दशकौँदेखि रोकिँदै आएको यो योजनालाई “इतिहासको नयाँ अध्याय” भन्ने अभिव्यक्ति दिनुभएको छ।

 मेसिनाको जलडमरूमध्यमाथि बन्ने उक्त झोलुङ्गे पुलको लम्बाइ ३.३ किलोमिटर रहनेछ। पुलको संरचना दुईवटा ४०० मिटर अग्ला टावरहरूबीच फैलिने गरी डिजाइन गरिएको छ। पुलमा बीच भागमा दुई रेललाइन र दुवैतिर तीन–तीन लेनको सडक हुनेछ। सरकारका अनुसार यो संरचना अत्याधुनिक इन्जिनियरिङ प्रविधिमार्फत निर्माण गरिनेछ, जसले तेज हावा र भूकम्पजस्ता प्राकृतिक जोखिम पनि सहनसक्नेछ।

 सरकारले यो पुल सन् २०३२ सम्म सम्पन्न गर्ने लक्ष्य लिएको छ। परियोजनाले सिसिली र क्यालाब्रिया क्षेत्रमा रोजगार वृद्धि र आर्थिक उत्थान ल्याउने अपेक्षा गरिएको छ। उपप्रधानमन्त्री साल्भिनीका अनुसार यसबाट दशौँ हजार रोजगारी सिर्जना हुनेछन्।

 तर परियोजनाप्रति आलोचना पनि उत्तिकै छ। स्थानीय समुदाय र वातावरणविद्हरूले यो संरचनाले पर्यावरणमा नकारात्मक असर पार्ने भन्दै विरोध जनाएका छन्। यस्तै, धेरै आलोचकले इटालीमा पटक–पटक घोषणा भए पनि अधुरै रहने ठूला सार्वजनिक परियोजनाको इतिहास सम्झाउँदै शंका व्यक्त गरेका छन्।

पुलको प्रारम्भिक योजना ५० वर्षभन्दा अघि तयार गरिएको थियो। सन् २००६ मा युरोलिङ्क नामक कन्सोर्टियमले ठेक्का जिते पनि युरोजोन ऋण संकटका कारण परियोजना स्थगित भएको थियो। अहिले Webuild समूहको नेतृत्वमा सोही कन्सोर्टियमले पुनः जिम्मा पाएको छ।

सरकारले यसपटक पुल निर्माणलाई ‘रक्षा–सम्बन्धित पूर्वाधार’ अन्तर्गत समावेश गर्दै अघि बढाउने रणनीति बनाएको छ। अमेरिकाका तत्कालीन राष्ट्रपति डोनाल्ड ट्रम्पको मागअनुसार इटालीले आफ्नो रक्षा खर्च जिडिपीको ५ प्रतिशत पुर्याउने प्रतिबद्धता जनाइसकेको छ।

त्यसमध्ये १.५ प्रतिशत साइबर सुरक्षा र पूर्वाधारमा खर्च गर्न सकिने भएकाले सिसिलीमा रहेको NATO सैन्य आधारलाई देखाएर मेसिना पुललाई रक्षा खर्च अन्तर्गत पार्न सरकार इच्छुक देखिएको छ।

 सन् २०३२ भित्र सम्पन्न गर्ने लक्ष्यसहित अगाडि बढाइएको यो परियोजना इटालीको पूर्वाधार इतिहासमा ऐतिहासिक बन्न सक्छ। तर लामो समयदेखि रोकिँदै आएको योजनाको विश्वसनीयता अझै परीक्षणमै छ। वातावरणीय चुनौती र स्थानीय असहमति समाधान गर्दै सरकारले यसपटक परियोजना पूरा गर्न सक्छ कि सक्दैन-त्यो समयले देखाउनेछ।