काठमाडौं, १२ जनवरी। चर्चित एमाले युवा नेता राम प्रसाद रिजालले सरकारको स्थिरता र पार्टीभित्रको विवादबारे नेपाल आजसँगको अन्तरवार्तामा तीव्र धारणा राखेका छन्। उनले अहिलेको सरकार कुनै पनि अवस्थामा ढल्ने सम्भावना नभएको दाबी गर्दै भने, “सरकारलाई ढलाउने भ्रम फैलाइएको छ, तर यो सरकार २०८४ सम्म अडिनेछ। हामीले सरकारलाई थप सुदृढ बनाउने काम गरिरहेका छौं।”

एमालेको आन्तरिक विवाद र भिम रावलको निष्कासन
एमालेको आन्तरिक विवाद र विशेष गरी भिम रावललाई पार्टीबाट निष्कासन गर्ने घटनाबारे बोल्दै रिजालले भने, “रोग लागेपछि त्यसको उपचार गर्नुपर्छ। पार्टीमा एउटा भाइरस हटेको छ।” उनले पार्टीलाई शुद्धीकरण गर्दै अघि बढाउन अनुशासन र व्यवस्थापनलाई सुदृढ गर्नुपर्ने धारणा राखे।

रवि लामिछाने र बालेन शाहमाथि कडा टिप्पणी
स्वतन्त्र पार्टीका सभापति रवि लामिछानेमाथि टिप्पणी गर्दै रिजालले भने, “अब उसलाई जीवनभर जेल बस्नु र अदालत धाउनु बाहेक केही काम छैन।” काठमाडौं महानगरपालिकाका मेयर बालेन शाहप्रति कटाक्ष गर्दै उनले भने, “उ मच्छर जस्तै टोक्न खोज्दै थियो, हामीले उसलाई रोक्न खोज्यौं।” रिजालका यी कडा अभिव्यक्तिहरूले समसामयिक राजनीतिमा उनको आक्रामक शैलीलाई उजागर गरेका छन्।

एमाले र कांग्रेसकै प्रभुत्वको दाबी
नेता रिजालले एमाले र कांग्रेसबाहेक अन्य कुनै पनि पार्टीले सत्तामा बस्न नसक्ने दाबी गर्दै भने, “अन्य पार्टीहरूले काम गर्न सक्दैनन्। नेपालको राजनीति एमाले र कांग्रेसकै वरिपरि घुम्छ।”

सामाजिक सञ्जालमा आलोचना खेपिरहेका रिजालले सकारात्मक उपयोगको आह्वान गर्दै भने, “गाली गरे पनि फरक पर्दैन। सामाजिक सञ्जाललाई साँचो र सकारात्मक तरिकाले प्रयोग गर्नुपर्छ।”

रिजालका अभिव्यक्तिहरूले नेपाली राजनीतिमा बहसको नयाँ तरंग सिर्जना गरेको छ।