आज बिहानबाट सुरु हुने भनिएको हमास र इजरायलबीचको युद्धविराममा ढिलाइ भएको छ। इजरायलले, हमासले आफ्नो कब्जामा रहेका बन्दीहरूको नाम सार्वजनिक नगरेको आरोप लगाउँदै युद्धविराम लागू गर्न आनाकानी गरेको छ।

इजरायलका प्रधानमन्त्री बेन्जामिन नेतन्याहुले गाजामा बिहान ८:३० बजेबाट लागु हुने भनिएको युद्धविराम हमासले अपहरणमा परेका व्यक्तिहरूको सूची उपलब्ध नगराएसम्म सुरु नगर्न इजरायल डिफेन्स फोर्स (आईडीएफ) लाई आदेश दिएका छन्।

प्रधानमन्त्री कार्यालयले जारी गरेको विज्ञप्तिमा भनिएको छ, "युद्धविरामको कार्यान्वयन हमासले वाचा गरेको सूची उपलब्ध गराउनासाथ मात्र हुनेछ।"

हमासले भने प्राविधिक समस्याहरूका कारण नाम हस्तान्तरण गर्न ढिलाइ भएको जनाएको छ। यद्यपि, उसले गत हप्ता घोषणा गरिएको युद्धविराम सम्झौताप्रति आफ्नो प्रतिबद्धता दोहोर्याएको छ।

यो विवादका कारण क्षेत्रीय तनाव अझै जारी छ। युद्धविराम कार्यान्वयनको लागि दुबै पक्षले सहमति गर्न सकेमा गाजामा शान्ति स्थापनाको आशा अझै जीवित छ।