डोनाल्ड ट्रम्पले आफ्नो पुरानो दाबीलाई पुनः दोहोर्‍याउँदै राष्ट्रपति पद सम्हालेको पहिलो दिनमै रुस-युक्रेन युद्ध रोक्ने प्रयासबारे प्रतिक्रिया जनाएका छन्। राष्ट्रपति कार्यालयमा पत्रकारहरूसँगको संवादका क्रममा उनले यो विषयमा आफ्नो धारणा स्पष्ट पारेका हुन्।

पत्रकारहरूले युद्ध रोक्ने विषयमा सोधेको प्रश्नमा उनले भने, ‘अहिले मलाई राष्ट्रपति भएको आधा दिन मात्र भएको छ। मसँग अझै आधा दिन बाँकी छ। के हुन्छ, हेर्नेछौँ।’

ट्रम्पले युक्रेनी राष्ट्रपति भोलोदिमिर जेलेन्स्कीले रुससँग युद्ध विराम सम्झौता गर्न चाहेको दाबी गर्दै आफूले यो विषयमा जानकारी पाएको उल्लेख गरे।

उनले भने, ‘मैले बुझेको छु कि युक्रेनी राष्ट्रपति भोलोदिमिर जेलेन्स्की युद्ध अन्त्य गर्न रुससँग सम्झौता गर्न चाहन्छन्। युद्धको अन्त्य जेलेन्स्कीको लागि राम्रो हुनेछ। अधिकांश मानिसहरूले रुस-युक्रेन युद्ध एक हप्तामा समाप्त हुनेछ भन्ने आशा गरेका थिए।’

ट्रम्पले युद्ध समाप्त हुने सङ्केत गर्दै यो प्रक्रिया दुवै पक्षका लागि लाभदायक हुने विश्वास व्यक्त गरे।

ट्रम्पको यो दाबीले अन्तर्राष्ट्रिय समुदायमा नयाँ आशा जागृत गरे पनि युद्ध समाधानका लागि वास्तविक कदमहरू कस्ता हुनेछन् भन्ने विषयमा चासो बढेको छ।