रसुवा, टिमुरे – स्याफ्रुबेसीदेखि रसुवागढीसम्मको सडक निर्माणमा भइरहेको ढिलाइ र दयनीय अवस्थाले स्थानीयवासी र गाडी चालकहरूलाई गम्भीर समस्या पारिरहेको छ। सडक निर्माणमा चिनियाँ कम्पनीको लापरबाही र सरकारी उदासीनताले यो महत्त्वपूर्ण रूटलाई झन् कठिन बनाएको छ।

स्थानीयवासीहरूले निर्माण कार्य समयमा सम्पन्न नभएकाले दैनिक जीवनमा ठूलो असर परेको बताएका छन्। गोसाइकुण्ड गाउँपालिका-२ का वडा अध्यक्ष कायस्थ छिरिङ तामाङले सडकको दयनीय अवस्थाले व्यापार र पर्यटनमा बाधा पुर्याएको बताए। यो सडकमा सरकार र सडक विभागले ध्यान दिएको भए, अहिले यस्तो अवस्था हुने थिएन। चिनियाँ कम्पनीले काम सुरु नगर्दा व्यापारिक तथा पर्यटकिय गतिविधिमा ठूलो असर परेको छ, तामाङले भने।

चालकहरूको समस्याः जाम र पासको झन्झट
रसुवागढी नाकामा पासको प्रक्रियाले गाडी चालकहरूलाई निकै तनाव दिएको छ। भक्तपुरका एक गाडी चालकले भने, पास पाउनका लागि के प्रक्रिया अपनाउनु पर्छ भन्ने थाहा छैन। बाहिरका चालकहरूले झन् धेरै समस्या भोग्नुपरेको छ।पासको जटिल प्रक्रियाका कारण, स्थानीय र बाह्य चालकहरूबीच भिन्नता र असमझदारीको स्थिति उत्पन्न भएको छ।

चालकहरूको अर्को मुख्य समस्या भनेको गाडी मर्मत हो। गाडी मर्मत गर्ने क्रममा समयमै राम्रो काम हुन सक्दैन। चालकलाई समस्या थाहा भए पनि अनावश्यक खर्च धेरै हुने गरेको छ, एक चालकले गुनासो गरे।

जामको समस्या र प्रशासनको लापरवाही
रसुवागढी नाकाको लोकल गाडीका सहचालक विकास नेपालीले प्रशासनको लापरवाही प्रति गुनासो गर्दै भने,  जिल्ला प्रशासन चुप लागेर बसेको छ, जसका कारण जामको समस्या दिनहुँ बढ्दै गएको छ। बुद्धिमान तामाङ, अर्का चालकले भने, यदि सबै चालकलाई बिहान जाँदा र बेलुका फर्कन मिल्ने गरी पास दिइने हो भने जामको समस्या समाधान हुनेछ।

महेश्वर, जो समान लोड गर्ने काम गर्छन्, एक दिनको बोर्डर बन्द हुँदा लामो जामको समस्या भएको बताए। चीन सरकारले गाडी आउन जान आफ्नो इच्छाअनुसार अनुमति दिने गरेको छ, जसले गर्दा जामको समस्या झन् बढेको हो, उनले भने।

प्रमुख घिमिरेको धारणा
रसुवा जिल्ला समन्वय कार्यालय प्रमुख अशोक कुमार घिमिरेले पनि रसुवागढी सडक निर्माणमा भइरहेको ढिलाइप्रति गहिरो असन्तोष व्यक्त गरे। ूसरकारी बजेट ढिलाइ र व्यवस्थापनको अभावले छिटो सकिन सक्ने काम वर्षौंसम्म लम्बिएको छ, उनले भने। घिमिरेका अनुसार, पासको प्रक्रिया सुधार गर्न र सडक निर्माणलाई प्राथमिकतामा राख्न सरकार र प्रशासनले सक्रिय भूमिका खेल्नुपर्ने आवश्यकता छ।

स्थानीयवासी र चालकहरूको समस्या समाधान गर्न सरकारको ठोस योजना अपरिहार्य छ। रसुवागढी नाका नेपालको व्यापारिक र रणनीतिक महत्त्वको क्षेत्र भएकाले यसको समस्या समाधान गर्न ढिलाइ गर्नु हुँदैन, घिमिरेले थपे।

समाधानको अपेक्षा
स्थानीय र चालकहरूको गुनासो, चिनियाँ कम्पनीको लापरवाही, र प्रशासनको अनदेखीले रसुवागढी सडकको अवस्था बिग्रँदै गएको छ। अब, सरकार र प्रशासनले समन्वय गरी यी समस्याहरू समाधान गर्न तत्काल कदम चाल्नुपर्ने स्थानीयवासी र चालकहरूको जोडदार माग छ। रसुवागढी नाकाको पुनर्निर्माणले मात्र यस क्षेत्रको व्यापार, पर्यटन, र जीवनस्तरलाई सुधार गर्न सक्ने विश्वास स्थानीयले व्यक्त गरेका छन्।