प्रधानमन्त्री सुशीला कार्कीले आगामी फागुन २१ गते हुने निर्वाचन निष्पक्ष र भयरहित रूपमा सम्पन्न गर्न सरकार पूर्ण रूपमा प्रतिबद्ध रहेको बताउनुभएको छ। उहाँले बसन्तपुरमा आयोजित नेपाल सम्वत् ११४६ नयाँ वर्षको स्वागत कार्यक्रममा बोल्दै विद्रोहपछिको राजनीतिक अवस्था सामान्यीकरण गर्ने प्रयाससँगै निर्वाचनलाई प्राथमिकता दिएर सरकार काममा जुटेको स्पष्ट पार्नुभयो।

प्रधानमन्त्री कार्कीका अनुसार सरकारले हाल स्थायित्व र सुशासनलाई सँगसँगै अघि बढाउने नीतिगत तयारी गरेको छ। “निर्वाचन प्राथमिकतामा छ भन्नुको अर्थ भ्रष्टाचार र सुशासनका मुद्दामा मौन बसेका छौँ भन्ने होइन,” उहाँले भन्नुभयो, “राज्य संयन्त्रहरू सुशासनका मागलाई सम्बोधन गर्ने दिशामा परिणाममुखी काम गर्दै छन्।”

उहाँले राजनीतिक संवादलाई निरन्तरता दिइरहेको जानकारी पनि दिनुभयो। “हरेक दिन दलहरूसँग संवाद भइरहेको छ। परिवर्तनका वाहक जेन-जी समुदायसँग पनि निरन्तर सम्पर्कमा छौँ,” प्रधानमन्त्रीले भन्नुभयो, “संविधानको अधीनमा रही उनीहरूले उठाएका आवाजलाई सम्बोधन गर्नु हाम्रो दायित्व हो।”

प्रधानमन्त्रीले निर्वाचनलाई लोकतान्त्रिक अभ्यासको निरन्तरता र सुशासनको आधारका रूपमा लिएर सबै दल र समुदायले सहकार्य गर्नुपर्नेमा जोड दिनुभयो। उहाँका शब्दमा, “आउनुहोस्, सचेत नागरिकको भूमिका निभाऔँ। सद्भाव, एकता र लोकतन्त्रको रक्षा गर्दै भ्रष्टाचार नियन्त्रण गर्ने साझा अभिभारा पूरा गरौँ।”

सरकारले निर्वाचनको तयारीलाई संस्थागत रूपमा अघि बढाइरहेको र राजनीतिक स्थायित्वका लागि सबै पक्षको साथ आवश्यक रहेको बताउँदै प्रधानमन्त्री कार्कीले देश अहिले संवेदनशील संक्रमण बिन्दुमा रहेको टिप्पणी गर्नुभयो। उहाँको भनाइले जनताको विश्वास जित्ने नेतृत्व र पारदर्शी संयन्त्रमार्फत मात्र आगामी निर्वाचनले स्थायित्व र सुशासनको दिशा तय गर्न सक्ने संकेत दिएको छ।