प्रतिनिधिसभाका सभामुख देवराज घिमिरेले नेपाल सम्वत् ११४६ को अवसरमा शुभकामना सन्देश जारी गर्दै देशले हासिल गरेको संवैधानिक उपलब्धिको रक्षा र सुशासनमा जोड दिएका छन्। उहाँले नेपाली समाजलाई समावेशी, समुन्नत र सुशासित दिशातर्फ एकजुट भई अघि बढ्न प्रेरित गराउने यो पर्वले राष्ट्रिय एकताको भावना थप मजबुत बनाओस् भन्ने कामना व्यक्त गर्नुभएको छ।

सभामुख घिमिरेले नेपाल सम्वत्लाई नेपालको मौलिक ऐतिहासिक पहिचानको प्रतीकका रूपमा स्मरण गर्दै यसले विविधतामाथि सहिष्णुता र भाइचाराको भावना बढाउने विश्वास व्यक्त गर्नुभयो। उहाँका अनुसार नेपाल सम्वत् केवल एक संवत् मात्र होइन, नेपाली जनताको स्वतन्त्रता, स्वाभिमान र आर्थिक मुक्ति प्रतीक पनि हो।

सन्देशमा उहाँले हालै युवापुस्ताले देशभर उठाएका भ्रष्टाचारविरोधी आवाजलाई देशको भविष्यप्रतिको नयाँ संकल्पको अवसरका रूपमा लिने बेला आएको टिप्पणी गर्नुभयो। “ती अपेक्षाहरू पूरा गर्न साझा प्रतिबद्धता, पारदर्शिता र उत्तरदायित्वपूर्ण नेतृत्व आवश्यक छ,” सभामुख घिमिरेको भनाइ छ।

युवाको आन्दोलनपछि स्थायित्व र शान्ति स्थापनाको बाटोलाई दीर्घकालीन परिणाममा पुर्‍याउन सरकार, राजनीतिक दल, नागरिक समाज र आम जनताको सहकार्य अपरिहार्य रहेको सभामुखको धारणा छ। उहाँले सशक्त नेतृत्व र एकताबद्ध प्रयासविना देशले सुशासन र समृद्धिको लक्ष्य हासिल गर्न कठिन हुने उल्लेख गर्नुभयो।

नेपाल सम्वत् स्थापना गर्ने राष्ट्रिय विभूति शङ्खधर साख्वाःको योगदान स्मरण गर्दै सभामुखले ऋणमुक्ति र आत्मनिर्भर जीवनको सन्देशलाई आजको समयसापेक्ष बनाउन आग्रह गर्नुभयो। उहाँले सबै नेपालीहरू ऋणमुक्त, आर्थिक रूपमा सशक्त र आत्मनिर्भर बन्न सकून् भन्ने शुभेच्छा प्रकट गर्नुभयो।

नेपाल सम्वत् नयाँ वर्षको यो सन्देशले विगतको गौरवसँगै भविष्यको उत्तरदायित्व पनि स्मरण गराएको छ—जहाँ इतिहासले देखाएको आत्मबल र वर्तमान पुस्ताको संकल्प एकै ठाउँमा आएर देशलाई सुशासन र समृद्धिको मार्गमा अघि बढाउन सक्छ।