काठमाडौं – अमेरिकाले नेपाल लगायतका विभिन्न देशलाई प्रदान गर्दै आएको एक खर्ब रुपैयाँ भन्दा बढीको सहायता रोक्ने निर्णय गरेको छ। यस निर्णयलाई अमेरिकाको डिपार्टमेन्ट अफ गर्भमेन्ट इफिसिएन्सी (डीओजीई) द्वारा लिइएको हो, जसका प्रमुख विश्वका धनी व्यक्तिहरू मध्ये एक, एलन मस्क हुन्।

अमेरिकी राष्ट्रपति डोनाल्ड ट्रम्पले सरकारी खर्च घटाउने उद्देश्यले यस निर्णयलाई अघि बढाएका थिए।

यस रोकमा नेपाललाई संघीयता र जैविक विविधताका क्षेत्रमा दिइरहेको ५ अर्ब ३९ करोड नेपाली रुपैयाँको सहयोग पनि समावेश भएको छ। डीओजीईले उक्त निर्णय सामाजिक सञ्जाल एक्समार्फत आइतबार सार्वजनिक गरेको हो।

यो सहायता रद्द गरिएको सूचीमा नेपालका साथै मोजाम्बिक, कम्बोडिया, पराग्वे, भारत, बंगलादेश, लाइबेरिया, माली लगायतका देशहरू पनि सामेल छन्।

अमेरिकी अन्तर्राष्ट्रिय विकास नियोग (यूएसएआईडी)ले सन् २०२२ देखि नेपाललाई प्रत्येक वर्ष औसत १२ करोड ५० लाख अमेरिकी डलर (करीब १७ अर्ब २९ करोड रुपैयाँ) सहायता दिँदै आएको थियो।

तर, अब अमेरिकाले यी देशहरूलाई दिइरहेको सहायता बन्द गरेको छ, जसका कारण नेपालमा पनि प्रभाव पर्न सक्ने अनुमान गरिएको छ।