बीरगंज, पर्सा –  राष्ट्रिय एकता अभियान पर्साका जिल्ला संयोजक बिकाऊ प्रसाद भण्डारी (थारू) को नेतृत्वमा बीरगंज महानगरपालिकाका नगर प्रमुख राजेशमान सिंहलाई  परवानीपुर हनुमान चौकमा भगवान  हनुमानको प्रतिमा निर्माण गर्न ज्ञापन पत्र बुझाइएको छ।

उक्त ज्ञापनपत्रमा, बीरगंज महानगरपालिका वड़ा नम्बर २१ अन्तर्गत त्रिभुवन राजपथको परवानीपुर हनुमान चौकमा भगवान  हनुमानको प्रतिमा स्थापना गरिनुपर्ने माग राखिएको छ। 

अभियानले नगरपालिकाले हालसम्म अगाडि बढाएका धार्मिक स्थलहरूको विकास र पुनर्निर्माण कार्यको प्रशंसा गर्दै, हनुमान चौकको ऐतिहासिक तथा धार्मिक महत्वलाई मध्यनजर गरी हनुमानकै भव्य प्रतिमा स्थापना गर्न आग्रह गरेको छ।

प्रतिमा निर्माणको महत्त्व ज्ञापन पत्रमा उल्लेख भएअनुसार, हनुमानको प्रतिमा निर्माणले स्थानीय हिन्दू जनताको आस्था थप बलियो बनाउने जनाइएको छ । बीरगंज महानगरपालिकाको प्रवेशद्वारलाई भव्य धार्मिक पहिचान दिन र सांस्कृतिक संरक्षण तथा धार्मिक सहिष्णुतामा योगदान पुर्याउने समेत ज्ञापनपत्रमा उल्लेख छ । 

राष्ट्रिय एकता अभियानले समेत बीरगंज महानगरपालिकाका नगर प्रमुख राजेशमान सिंहलाई  यो परियोजनामा आवश्यक पहल गरी हनुमान जीको प्रतिमा स्थापनाका लागि औपचारिक प्रक्रिया अघि बढाउन अनुरोध गरेको छ।

ज्ञापन पत्र बुझाउने कार्यक्रममा अभियानका विभिन्न पदाधिकारी तथा स्थानीय समाजसेवीहरूको उपस्थिति रहेको थियो। अभियानले धार्मिक सहिष्णुता, सांस्कृतिक पहिचान र सामाजिक एकता मजबुत बनाउनका लागि यस कार्यलाई महत्वपूर्ण ठानेको छ।