भारतमै समातिए राजावादी नेता दुर्गा प्रसाईं! अब त भारतीय समर्थनको आरोप सकियो!
राजावादी आन्दोलनका प्रमुख कमान्डरका रूपमा परिचित व्यावसायी दुर्गा प्रसाईं भारतको असाम राज्यबाट पक्राउ परेका छन्। चैत १५ गते तीनकुनेमा भएको हिंसात्मक प्रदर्शनका नाइकेका रूपमा प्रहरीले उनीमाथि अनुसन्धान गरिरहेको थियो। प्रहरी स्रोतका अनुसार उनलाई भारतको असामबाट पक्राउ गरी काकडभिट्टा हुँदै नेपाल ल्याइँदै छ।
तीनकुने घटनामा प्रहरीमाथि गाडीले आक्रमण गरेर फरार भएका प्रसाईं केही समय सम्पर्कविहीन भएका थिए। तर, सामाजिक सञ्जालमार्फत उनले आफू फरार नभएको दाबी गर्दै आएका थिए। त्यसयता प्रहरीले उनको खोजी तीव्र बनाएको थियो।
भारत सरकारको भूमिकाले हटायो भ्रम
दुर्गा प्रसाईंलाई भारतमै समातिएको घटना आफैंमा निकै महत्वपूर्ण राजनीतिक सन्देश बोकेको छ। नेपाल सरकारको अनुरोधमा भारतीय प्रशासनले पक्राउ गरिदिएको यो घटनाले दुई देशबीचको समन्वय उच्च रहेको पुष्टि गरेको छ। विशेषगरी, भारतले नेपालमा भएको राजावादी आन्दोलनलाई गुप्त समर्थन दिएको भन्ने आरोपहरू यस घटनापछि स्वतः खारेज भएका छन्।
एकजना उच्च सुरक्षा स्रोतका अनुसार, "भारत सरकारले दुर्गा प्रसाईंको गिरफ्तारीका लागि नेपाल सरकारसँग पूर्ण सहकार्य गरेको छ, जुन दुई देशबीचको सुरक्षात्मक पारदर्शिताको प्रतिबिम्ब हो।"
राजावादी आन्दोलनको पछिल्लो अध्याय
दुर्गा प्रसाईं चैत १५ गतेको प्रदर्शनपछि भूमिगत भएका थिए। त्यस दिन राजधानीको तीनकुने क्षेत्रमा भएको आन्दोलनमा सुरक्षाकर्मीहरूमाथि कडा आक्रमण भएको थियो। घटनामा संलग्नताका लागि उनलाई मुख्य योजनाकार मानिँदै आएको छ।
उनको गिरफ्तारीले आन्दोलनको नेतृत्व पक्षमा ठूलो धक्का लागेको छ भने नेपालभित्र राजसंस्था पुनःस्थापनाको माग गर्दै भइरहेका प्रदर्शनहरू अब थप विश्लेषणको घेरामा पर्ने देखिन्छ।
दुर्गा प्रसाईंको भारतमा गिरफ्तारीले भारत र नेपालबीचको समन्वय, विश्वास र क्षेत्रीय स्थायित्वप्रति प्रतिबद्धता स्पष्ट पारेको छ। अब भारतले नेपालमा राजावादी आन्दोलनलाई समर्थन गरेको भन्ने राजनीतिक आरोपहरूलाई बल नलाग्ने निश्चित भएको छ।
“यो गिरफ्तारीले भारत-नेपाल सम्बन्धमा देखिएको आरोप र आशंकामाथि पूर्णविराम लगाएको छ,” एक विश्लेषकले भने, “अब भारतप्रति गरिएको राजनीतिक दुष्प्रचारमा विश्वसनीयता छैन।”
