मित्रताको सवारी: सगरमाथा सम्वादलाई सहज बनाउन भारतद्वारा नेपाललाई १५ विद्युतीय सवारी साधन उपहार
काठमाडौं – नेपाल र भारतबीचको गहिरो मित्रता र सद्भावनाको प्रतीकस्वरुप भारतले नेपाल सरकारलाई १५ वटा विद्युतीय सवारी साधन उपहार दिएको छ। आसन्न ‘सगरमाथा सम्वाद’ को आयोजनालाई थप सहज बनाउने उद्देश्यले गरिएको यो हस्तान्तरण आज काठमाडौंमा सम्पन्न भयो।
नेपालका लागि भारतीय राजदूत श्री नवीन श्रीवास्तवले माननीय परराष्ट्रमन्त्री डा. आरजु राणा देउवालाई ती सवारी साधनको साँचो हस्तान्तरण गर्नुभयो। यही जेठ २ गतेदेखि ४ गतेसम्म (मे १६ देखि १८, २०२५) सञ्चालन हुने ‘सगरमाथा सम्वाद’ को पहिलो संस्करणमा सहभागी हुने अतिथि तथा अधिकारीहरूको आवागमनलाई सहज बनाउन यी गाडीहरू उपयोगी हुनेछन्।
यस वर्षको सम्वादको मुख्य विषय ‘जलवायु परिवर्तन, हिमाल र मानवताको भविष्य’ रहेको छ। वातावरणसम्बन्धी छलफल हुन लागेको महत्वपूर्ण कार्यक्रमका लागि वातावरणमैत्री विद्युतीय गाडीको उपहार आफैंमा अर्थपूर्ण छ। यसले दिगोपनप्रतिको साझा प्रतिबद्धतालाई पनि उजागर गर्छ, जसले व्यावहारिक सहयोगमा भावनात्मक सम्बन्धको पत्र थपेको छ।
हस्तान्तरण समारोहमा बोल्दै राजदूत श्रीवास्तवले यी शान्त र प्रदूषणरहित गाडीहरूले सम्वादको क्रममा पाहुना तथा अधिकारीहरूको ओहोरदोहोरलाई निकै सहज बनाउने विश्वास व्यक्त गर्नुभयो। वहाँले सन् २०७९ मा सम्पन्न संघीय तथा प्रदेश सभा निर्वाचनको बेला भारत सरकारले सुरक्षा निकाय र निर्वाचन आयोगलाई गरेको यस्तै किसिमको लजिस्टिक सहयोगलाई स्मरण गर्दै दिगो साझेदारीको भावनामा जोड दिनुभयो। सम्वादको पूर्ण सफलताको लागि नेपाल सरकार र जनतालाई शुभकामना व्यक्त गर्दै राजदूतले पारस्परिक प्रगति र विकासको यात्रामा नेपालसँग सँगै हिँड्ने भारतको अटल प्रतिबद्धता दोहोर्याउनुभयो।
भारत सरकारको तर्फबाट प्राप्त यो उपहार ग्रहण गर्दै माननीय परराष्ट्रमन्त्री डा. आरजु राणा देउवाले नेपाल सरकारको तर्फबाट हार्दिक कृतज्ञता व्यक्त गर्नुभयो। वहाँले भारतलाई नेपालको सबैभन्दा पुरानो र भरपर्दो विकास साझेदारका रूपमा स्मरण गर्दै विगतदेखि हालसम्म भारतले गरेको सहयोगको उच्च प्रशंसा गर्नुभयो।
आधुनिक र वातावरणमैत्री यातायातको साधन उपलब्ध गराउने यो कार्य सामान्य लजिस्टिक सहयोग मात्र होइन। यसले भारत र नेपालबीचको जीवन्त, बहुआयामिक साझेदारीलाई प्रतिबिम्बित गर्दछ, जुन दुवै देशका जनताबीचको गहिरो सम्बन्धमा आधारित छ। यस प्रकारका उपहारहरूले जनता-जनताबीचको सम्बन्धलाई थप मजबुत बनाउन र साझा प्रगतिको लागि सहकार्य जारी राख्न भारत सरकारको निरन्तर सहयोगको ठोस प्रमाण प्रस्तुत गर्दछ।
