प्रधानमन्त्री केपी शर्मा ओलीले गाईजात्रा पर्वको अवसरमा देश-विदेशमा रहेका नेपालीहरूलाई हार्दिक शुभकामना व्यक्त गरेका छन्।

उनले आज सामाजिक सञ्जालमार्फत गाईजात्रा मनाउनेहरूका परिवारमा छिट्टै शोक निवारण होस् भन्ने कामना गर्दै, यस पर्वलाई व्यङ्ग्य–विनोदका रूपमा मनाउनेहरूलाई स्वस्थ मनोरञ्जन प्राप्त होस् भन्ने शुभेच्छा दिएका छन्।

ओलीले गाईजात्रा मध्यकालीन समयमा नेवारी परम्पराबाट सुरु भई प्रताप मल्लको कालदेखि देशभर मनाउन थालिएको ऐतिहासिक पृष्ठभूमि स्मरण गराएका छन्। उनका अनुसार, मृत्यु शोकमा रहेका परिवारले घरबाट गाईजात्रा निकाल्ने परम्पराले “मृत्यु सबैका परिवारमा आउँछ” भन्ने सान्त्वनापूर्ण मनोवैज्ञानिक सन्देश दिन थालेको हो।

यस पर्वको उद्देश्य सामाजिक मनोविज्ञानलाई मृत्युको भयबाट सान्त्वनातर्फ ल्याउँदै पीडा कम गर्नु भए पनि, समयक्रममा यसले हास्य–व्यङ्ग्यको स्वरूप पनि पाएको ओलीले बताएका छन्।

भाद्र कृष्ण प्रतिपदादेखि अष्टमीसम्म आठ दिन मनाइने गाईजात्रा आज काठमाडौं उपत्यकासहित देशभर विविध सांस्कृतिक कार्यक्रमसहित मनाइँदैछ।