प्रधानमन्त्री केपी शर्मा ओलीले आइतबार राष्ट्रपति रामचन्द्र पौडेलसँग भेटवार्ता गर्नुभएको छ।

राष्ट्रपति भवन शीतल निवासमा भएको सो भेटमा प्रधानमन्त्री ओलीले हालै तुर्कमेनिस्तानमा सम्पन्न भूपरिवेष्टित विकासशील राष्ट्रहरूको तेस्रो संयुक्त राष्ट्रसङ्घीय सम्मेलनका बारेमा राष्ट्रपति पौडेललाई जानकारी गराउनुभएको राष्ट्रपतिको स्वकीय सचिवालयले जनाएको छ। प्रधानमन्त्री ओली साउन २० देखि २३ गतेसम्म (५–८ अगस्ट २०२५) आयोजित सो सम्मेलनमा सहभागी भएर शनिबार स्वदेश फर्कनुभएको हो।

उक्त अवसरमा द्विपक्षीय र बहुपक्षीय विषयमा समेत उच्चस्तरीय वार्ता भएको बताइएको छ। भेटमा सम्मेलनको अनुभव र उपलब्धिबाहेक देशका समसामयिक राजनीतिक तथा आर्थिक अवस्थाबारे पनि छलफल भएको जनाइएको छ।