लुम्बिनी प्रदेशका मुख्यमन्त्री चेतनारायण आचार्यले आर्थिक अनुशासन कायम राख्न बेरुजु फर्छ्योटलाई सरकारको विशेष प्राथमिकतामा राखिएको बताएका छन्।

आइतबार प्रदेश सभा सार्वजनिक लेखा समितिद्वारा प्रदेश सभा सचिवालयमा आयोजित बैठकमा उनले हरेक मन्त्रालय र कार्यालयलाई बेरुजु असुल–उपरमा सक्रिय भूमिका बढाउन निर्देशन दिए। आचार्यका अनुसार योजना निर्माण र नीति तर्जुमा गर्दा प्राथमिकतामा परेका विषयलाई बजेटमा समावेश गरी कार्यान्वयन गरिनेछ।

बैठकमा महालेखा परीक्षकको सातौँ प्रतिवेदनमा उल्लेख बेरुजुबारे छलफल भएको थियो। समितिले बेरुजु फर्छ्योटको उपलब्धि मासिक प्रतिवेदन बुझाउन पनि जोड दिएको छ। बैठकमा मन्त्रीहरू, प्रमुख सचिव, मन्त्रालयका सचिवहरू र समितिका सदस्यहरूको सहभागिता थियो।