रौतहटको चन्द्रनिगाहपुर–४, धनसारबाट प्रहरीले ९ किलो ७५० ग्राम लागुऔषध गाँजासहित एक जनालाई पक्राउ गरेको छ।

इलाका प्रहरी कार्यालय चन्द्रनिगाहपुरका प्रहरी सहायक निरीक्षक टीकामाया सिवाकोटीको नेतृत्वमा खटिएको टोलीले पूर्व–पश्चिम सडकखण्डमा पश्चिमबाट पूर्वतर्फ आउँदै गरेको ना. ८० प. ९८९३ नम्बरको मोटरसाइकललाई शंका लागी चेकजाँच गर्दा गाँजा बरामद भएको हो।

जिल्ला प्रहरी कार्यालय रौतहटका प्रवक्ता प्रहरी नायब उपरीक्षक दीपककुमार रायका अनुसार पक्राउ परेका व्यक्ति बारा जिल्ला निजगढ नगरपालिका–१२ निवासी ३४ वर्षीय दीपक थिङ हुन्। उनले गाँजा जेब्रा झोलामा लुकाइ–छिपाइ ल्याउँदै गरेको प्रहरीले जनाएको छ।