नेपाल कम्युनिष्ट पार्टी (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले हाल सरकारमा जाने विषय आफ्नो पार्टीको प्राथमिकतामा नरहेको स्पष्ट पार्नुभएको छ । आइतबार पत्रकारसँग कुरा गर्दै उहाँले सरकारले गरेका कामको विरोध गर्दा माओवादीलाई सत्ता चाहिएको जसरी प्रस्तुत गर्ने प्रवृत्ति गलत भएको टिप्पणी गर्नुभयो ।

“यो सरकारले राम्रो काम गरिरहेको छैन भन्ने कुरा उठाउँदा सत्ता चाहिएको हो भनेर बुझ्नु हुँदैन । हामीलाई अहिले सरकारमा जाने कुनै चासो छैन,” उहाँको भनाइ थियो ।

उहाँका अनुसार माओवादी केन्द्रले भदौ तेस्रो साताबाट विगतमा स्थगित अभियानलाई पुनः सुरु गर्ने तयारी गरेको छ । त्यसपछि केन्द्रीय समितिको बैठक बसेर नयाँ एजेन्डासहित अघि बढ्ने योजना रहेको बताउनुभयो ।

“हाल सरकारभन्दा जनताको गुनासा सुन्ने र ती समस्याको समाधानमा केन्द्रित रहने हाम्रो उद्देश्य हो,” प्रचण्डले स्पष्ट पार्नुभयो । हालै सम्पन्न स्थायी समिति बैठकपछि पार्टी अझै एकताबद्ध भएको दाबी गर्दै उहाँले सो बैठकका निर्णयहरूलाई कार्यान्वयनमा ल्याइने जानकारी दिनुभयो ।

फरक प्रसङ्गमा, अध्यक्ष प्रचण्डले निर्माणाधीन गौतमबुद्ध अन्तर्राष्ट्रिय क्रिकेट रंगशालाको अवलोकन गर्दै काम द्रुत गतिमा अघि बढाउनुपर्ने आवश्यकता औंल्याउनुभएको छ ।