आज साउन महिनाको अन्तिम सोमबार देशभरका शिवालयहरूमा बिहानैदेखि भक्तजनहरूको ठूलो भीड लागेको छ। विशेषतः पशुपतिनाथ मन्दिर परिसरमा व्रतधारी महिला तथा बोलबम तीर्थालुहरूको उपस्थितिले धार्मिक माहोल अझै रंगिन बनेको छ।

साउन महिनामा प्रत्येक सोमबार भगवान शिवको पूजा विशेष मानिने भएकाले श्रद्धालुहरूले बिहानैदेखि व्रत, पूजापाठ र दान गरेका छन्। महिलाहरूले आजको पूजासँगै साउन भरि गरेको व्रत विधिपूर्वक समाप्त गरेका छन्।

काठमाडौंको सुन्दरीजलबाट जल बोकेर आएका बोलबम भक्तजनहरूले पशुपतिनाथमा जल चढाउने क्रम बिहानैदेखि निरन्तर जारी छ।

यसैगरी भक्तपुरको डोलेश्वर, ललितपुरको कुम्भेश्वर, पूर्वको हलेसी, सुनसरीको पिण्डेश्वर, म्याग्दीको गलेश्वर, कपिलवस्तुको कुशेश्वर, पर्वतको गुप्तेश्वर, जनकपुरको कपिलेश्वर, जलेश्वरको सिरेश्वर र कलानेश्वरलगायतका शिवालयहरूमा पनि घुइँचो लागेको छ।

चितवन, नवलपरासी र तनहुँको संगमस्थल देवघाटधाममा समेत पूजा गर्ने र मेला भर्ने भक्तजनको भीड बाक्लो देखिएको छ। धार्मिक आस्थासँगै मेलापात र भेटघाटले देशभरका शिवालयहरू आज अत्यन्तै जीवन्त बनेका छन्।