सिराहा र धनुषा जिल्लालाई जोड्ने कमला नदीमाथिको ४६९ मिटर लामो पक्की पुल १४ वर्षसम्म पनि पूरा हुन सकेको छैन । विसं २०६८ मा तीन वर्षभित्र सम्पन्न गर्ने लक्ष्यसहित सुरु गरिएको यो परियोजना अझै अधुरो रहँदा स्थानीयवासी वर्षेनी सास्ती भोग्न बाध्य छन् ।

पुल नहुँदा वर्षायाममा अस्थायी बाँस वा काठका पुलमार्फत जोखिमपूर्ण यात्रा गर्नुपर्ने अवस्था छ । यही साउनको तेस्रो हप्तामा आएको बाढीले बाँसको पुल बगाएपछि आवतजावत ठप्प भएको थियो । हाल काठको संरचना बनाएर आवतजावत सुरु भए पनि दुर्घटनाको जोखिम यथावत छ ।

सिराहा–६ का प्रवीण यादव भन्छन्, “पुल नबन्दा हामी वर्षौँदेखि सास्ती भोग्दै आएका छौँ । अहिले बनाइएको काठे संरचना जोखिमपूर्ण छ, तर त्यही बाटो भएर हिँड्न बाध्य छौँ । मोटरसाइकलमा यात्रा गर्दा अझै डर लाग्छ । त्यसमा पनि यात्रुहरूमाथि मनपरी शुल्क असुली भइरहेको छ ।” नगरपालिकाले निःशुल्क सञ्चालनको दाबी गरे पनि रु. ५० सम्म तिर्नुपर्ने गुनासो छ ।

यस पुल निर्माणको जिम्मा सुरुवातमा पप्पु–लुम्बिनी जेभीलाई दिइएको थियो । पप्पु कन्स्ट्रक्सन कालोसूचीमा परेपछि काम लुम्बिनी बिल्डर्सले थाले पनि बाढीले दुई पाया भासिएपछि आवश्यक मर्मतका लागि आठ करोडको बीमा रकम नपाएको कारण देखाउँदै कम्पनीले काम रोकिदिएको हो ।

हुलाकी राजमार्ग निर्देशनालय, योजना कार्यालय जनकपुरका सूचना अधिकारी इञ्जिनियर रञ्जितकुमार रायका अनुसार, निर्माण कम्पनीले तोकिएको म्यादमै काम रोकेकाले ठेक्का तोडेर लुम्बिनी बिल्डर्सलाई पनि कालोसूचीमा राख्ने प्रक्रिया अघि बढाइएको छ ।

सिराहा–६ का वडाध्यक्ष इन्द्रजित यादवका अनुसार, पुल नहुँदा बाढीपछिको समयमा पैदलयात्रुले बाँसको भर्‍याङ चढेर वा डुङ्गाबाट नदी पार गर्नुपर्ने बाध्यता छ । कमला नदीको पुल अधुरो रहँदा हरेक वर्षको वर्षायाममा स्थानीयका लागि यो चुनौती दोहोरिन्छ ।