लगातारको वर्षाका कारण कालिगण्डकी कोरिडोरअन्तर्गत बेनी–जोमसोम सडक खण्ड पूर्णरूपमा अवरुद्ध भएको छ।आइतबार साँझ केही बेर सञ्चालनमा आएको यातायात वर्षा रोकिएनपछि फेरि अवरुद्ध बनेको जिल्ला प्रहरी कार्यालय म्याग्दीले जनाएको छ।

म्याग्दी खण्डका बैसरी नजिकको सिरुबारी, भुरुङ भिर, गुइँठेभिर, सुकेबगर र म्याग्दी–मुस्ताङ सिमानास्थित काभ्रेभिरमा पहिरो खसेका कारण सडक बन्द भएको हो।कालिगण्डकी कोरिडोर सडक आयोजनाका सब–इन्जिनियर गणेशमान श्रेष्ठका अनुसार वर्षा नरोकिएकाले पहिरो हटाउने कार्य कठिन बनेको छ।

“पानी लगातार पर्ला जस्तो देखिन्छ। पहिरो हटाएर सडक खोल्दा पनि केही बेरमै फेरि पहिरो खस्छ,” श्रेष्ठले भने, “सिरुबारी, सुकेबगर र काभ्रेभिरमा ठूलो पहिरो भएकाले यातायात सुचारु गर्न कम्तीमा ५–६ घण्टा लाग्न सक्छ।”

सडक अवरुद्ध हुँदा मुस्ताङ गएका धार्मिक पर्यटक र अन्य यात्रु बाटोमै अलपत्र परेका छन्। जिल्ला प्रशासन कार्यालय म्याग्दीले सडकको अवस्थाबारे जानकारी लिएर मात्र यात्रा गर्न आग्रह गरेको छ।

त्यस्तै, म्याग्दी पश्चिम जोड्ने बेनी–दरबाङ सडक खण्डको फापरखेतमा पहिरो खसेपछि यातायात बन्द भएको छ भने अन्य ग्रामीण सडक पनि साना पहिरोका कारण अवरुद्ध भएका छन्।