संयुक्त राष्ट्रसंघीय राजनीतिक तथा शान्ति निर्माण मामिला विभाग, युरोपका लागि सहायक महासचिव मिरोस्लाभ जेनोचाले गाजाको मानवीय संकट अन्त्य गर्ने एक मात्र उपाय तत्काल, पूर्ण र स्थायी युद्धविराम भएको बताएका छन्।

सुरक्षा परिषद्को आपतकालीन बैठकमा उनले इजरायली सरकारको हालैको गाजासम्बन्धी निर्णयले इजरायल–प्यालेस्टिनी क्षेत्र मात्र होइन, सम्पूर्ण क्षेत्रीय स्थायित्वलाई खतरामा पार्ने चेतावनी दिएका छन्। उनले बन्धकहरूको बिना शर्त तत्काल रिहाइ र मानवीय सहायता अवरोधबिनाको वितरणको आवश्यकता औंल्याए।

जेनोचाले नागरिक तथा मानवीय कार्यकर्ताको सुरक्षा सुनिश्चित गर्न अन्तर्राष्ट्रिय मानवीय कानुनको पालना गर्न इजरायललाई आह्वान गरे। साथै, इजरायलको गैरकानुनी कब्जा अन्त्य नगरी गाजामा दीर्घकालीन शान्ति सम्भव नहुने र गाजा स्वतन्त्र प्यालेस्टिनी राज्यको अभिन्न हिस्सा भएको प्रष्ट पारे।

संयुक्त राष्ट्रसंघ महासचिव एन्टोनियो गुटेर्रेसले पनि इजरायलको गाजा नियन्त्रण गर्ने योजनाप्रति गम्भीर चिन्ता व्यक्त गर्दै यसले विनाश बढाउने र लाखौंको जीवन जोखिममा पार्ने चेतावनी दिएका छन्। मानव अधिकारका लागि संयुक्त राष्ट्रसंघीय उच्चायुक्त भोल्कर तुर्कले कब्जा गरिएको गाजा पट्टीमा नियन्त्रण गर्ने योजना रोक्न आग्रह गरेका छन्।