एन आई सी एशिया बैंकका ग्राहकले अब सिजी कम्युनिकेसन्स लिमिटेडको इन्टरनेट तथा आइपीटिभी सेवामा विशेष छुट पाउने भएका छन्। दुवै संस्थाबीच हाल सम्पन्न सम्झौताअनुसार बैंकका व्यक्तिगत ग्राहकले पहिलो पटक सेवा लिँदा वार्षिक शुल्कमा २,५०० रूपैयाँ छुट पाउनेछन् भने संस्थागत ग्राहकले २० प्रतिशतसम्मको छुट प्राप्त गर्नेछन्।

सम्झौतामा एन आई सी एशिया बैंकका सहायक प्रमुख कार्यकारी अधिकृत जयन्द्र रावल र सिजी कम्युनिकेसन्सका प्रमुख कार्यकारी अधिकृत सुजन थापाले हस्ताक्षर गरेका हुन्। सम्झौताअनुसार बैंकका ग्राहकले सिजी नेटको १५०, २५० वा ३५० एमबीपीएस क्षमताका इन्टरनेट प्याकेज वार्षिक भुक्तानीमा २,५०० रूपैयाँ छुटसहित प्राप्त गर्न सक्नेछन्। साथै, नयाँ ग्राहकले इन्टरनेटसँगै आइपीटिभी सेवा लिँदा पनि सोही छुट पाउने व्यवस्था छ।

हाल सेवाग्राही रहेका ग्राहकले सेवा नवीकरण गर्दा वार्षिक योजनामा थप एक महिनाको सुविधा पाउनेछन्। सुविधा प्राप्त गर्नका लागि ग्राहकले सेवा सुरु गर्नुअघि सिजी कम्युनिकेसन्सको आधिकारिक फोन, वेबसाइट वा शाखा कार्यालयमार्फत जानकारी गराउनुपर्नेछ।

एन आई सी एशिया बैंकले यस सहकार्यले आफ्ना ग्राहकलाई इन्टरनेट सेवामा प्रत्यक्ष लाभका साथै मुलुकमा डिजिटल भुक्तानी प्रणालीको उपयोग बढाउन र नगदरहित कारोबार प्रवर्द्धनमा योगदान पुर्‍याउने विश्वास व्यक्त गरेको छ।