मध्यपहाडी लोकमार्गको बागलुङ खण्ड वर्षौंदेखि जीर्ण अवस्थामा रहेर स्थानीयलाई निरन्तर सास्ती दिइरहेको छ। बागलुङ बजारदेखि बिहुँसम्मको भागमा कतै पहिरो खसेर अवरुद्ध हुन्छ, कतै सडकको मोड साँघुरो भएर दुर्घटनाको जोखिम बढ्छ। लामो समयदेखि स्तरोन्नति हुन नसकेकाले यस खण्डको यात्रा यात्रु र सवारी चालकका लागि चुनौतीपूर्ण बन्दै गएको छ।

राष्ट्रिय गौरवको आयोजनाअन्तर्गत पर्ने यो सडकको बागलुङ खण्डमा मात्रै १२५ किलोमिटर मार्ग बागलुङ नगरपालिका, काठेखोला गाउँपालिका, गलकोट नगरपालिका, बडिगाड गाउँपालिका, ढोरपाटन नगरपालिका र निसीखोला गाउँपालिकामा फैलिएको छ। तर, दशकौंको प्रतिक्षा र बजेट विनियोजन हुँदाहुँदै पनि यसको गुणस्तरीय निर्माण टुंगोमा पुग्न सकेको छैन।

बिहुँदेखि घोडाबाँधेसम्मको करिब १३ किलोमिटर सडक स्तरोन्नतिको लागि वि.स. २०७२ माघमा एमपी/एससीएफ/ई सिसी जेभीले ठेक्का पाएको थियो। तर कम्पनी कालोसूचीमा परेपछि ठेक्का सूर्य कन्ट्रक्सन सुर्खेत र एलिट कन्ट्रक्सनल प्रा.लि. सुकेधाराले संयुक्त रुपमा पाएका थिए। यद्यपि, ठेक्का पाएको लामो समय बितिसक्दा पनि काम अघि बढ्न सकेको छैन।

काठेखोला गाउँपालिका–६ का वडा सदस्य टीकाराम कँडेलका अनुसार, ठेकेदार कम्पनीको लापरबाही र ढिलासुस्तीका कारण स्थानीय बासिन्दाले वर्षौंसम्म धुलो, हिलो र जोखिमपूर्ण यात्राको पीडा सहन बाध्य भएका छन्। सडक स्तरोन्नतिको प्रगति नहुनु केवल भौतिक पूर्वाधारको अवरोध मात्र नभई स्थानीय आर्थिक गतिविधि र यातायात सुरक्षामा पनि गम्भीर असर पारिरहेको छ।

अब यो खण्डको निर्माणमा देखिएको ढिलासुस्ती अन्त्य भई गुणस्तरीय काम समयमै सम्पन्न हुनु, स्थानीयको जीवनस्तर र सम्पूर्ण मध्यपहाडी लोकमार्गको यातायात सहजताका लागि निर्णायक हुनेछ।