माल्टामा सडक दुर्घटनामा नेपाली नागरिकको मृत्यु भएपछि त्यहाँको नेपाली समुदायले न्यायिक छानबिन र दोषीमाथि कारबाहीको मागसहित संसद भवन अगाडि विरोध प्रदर्शन गरेको छ। गैरआवासीय नेपाली सङ्घ (एनआरएनए) राष्ट्रिय समन्वय परिषद् माल्टाका अध्यक्ष सत्यनारायण झाका अनुसार आइतबार बिहान बिर्किकारामा भएको दुर्घटनामा म्याग्दीका ४२ वर्षीय खिमबहादुर पुनको ज्यान गएको थियो। करिब तीन वर्षअघि रोजगारीका लागि माल्टा पुगेका पुन ‘फुड डेलिभरी’ पेशामा संलग्न थिए।

झाका भनाइअनुसार पुन चढेको मोटरसाइकल सडक किनारमा रोकिएको अवस्थामा एक कारले ठक्कर दिएको थियो। गम्भीर घाइते भएका उनलाई उपचारका लागि अस्पताल पुर्‍याइए पनि बचाउन सकिएन। दुर्घटनामा संलग्न १७ वर्षीय कार चालकलाई माल्टा प्रहरीले नियन्त्रणमा लिएको छ। उनीसँग चालक अनुमति पत्र नभएको पुष्टिएकाले धरौटीमा रिहा नगर्न, पीडित परिवारलाई क्षतिपूर्ति उपलब्ध गराउन र छानबिनमा पारदर्शिता सुनिश्चित गर्न माग गर्दै विरोध प्रदर्शन गरिएको अध्यक्ष झाले बताए।

पुनको शव नेपाल पठाउन र अन्त्येष्टिका खर्च जुटाउन एनआरएनए माल्टाले सहयोग संकलन सुरु गरेको छ। परिषद् अनुसार शव बुधबार नेपाल पठाउने तयारी भइरहेको छ। विदेशमा श्रम र जीवन बिताइरहेका नेपालीका लागि यो घटना सडक सुरक्षा र कानुनी उत्तरदायित्वको संवेदनशीलता झल्काउने दुःखद स्मरण बनेको छ।