स्वास्थ्य तथा जनसङ्ख्या मन्त्री प्रदीप पौडेलले निर्माण सम्पन्न भई हस्तान्तरण भएका ५५ वटा आधारभूत अस्पताल सञ्चालनमा ल्याउन संघ, प्रदेश र स्थानीय तहबीच आपसी समन्वयका साथ काम भइरहेको स्पष्ट गर्नुभएको छ। बुधबार प्रतिनिधिसभाको बैठकमा सांसदहरूको प्रश्नको जवाफ दिँदै उहाँले देशभर निर्माण सकिएका र स्थानीय तहलाई हस्तान्तरण भएका अन्य अस्पतालहरूलाई पनि क्रमशः सञ्चालनमा ल्याउने कार्यक्रम अघि बढाइएको जानकारी दिनुभयो। यी अस्पतालमा चिकित्सक नियुक्ति र आवश्यक उपकरण आपूर्ति तयारीमा रहेको उहाँको भनाइ थियो।

मन्त्री पौडेलका अनुसार मन्त्रालयले प्रतिबद्धता जनाएका दायित्वहरू प्रक्रियागत ढाँचामा समयमै पूरा गर्ने प्रयास भइरहेको छ। तर, कतिपय अस्पतालमा भवन त तयार भए पनि हस्तान्तरण प्रक्रिया पूरा नभएको, निर्माण पूर्णरूपमा सम्पन्न नभएको वा कानुनी विवादमा परेका कारण तत्काल सञ्चालन सम्भव नभएको उहाँले औंल्याउनुभयो। “बाहिरबाट हेर्दा भवन तयार देखिन्छ, तर भित्री रूपमा प्रक्रिया टुङ्गो लागिसकेको हुँदैन,” उहाँले टिप्पणी गर्नुभयो।

उहाँले बाँकेको राप्ती सोनारी, नरैनापुर–४ स्थित एक अस्पतालको भौतिक प्रगति शतप्रतिशत पूरा भए पनि हस्तान्तरण प्रक्रिया बाँकी रहेको बताउँदै, हस्तान्तरणलगत्तै सेवा सुरु हुने आश्वासन दिनुभयो। अस्पताल सञ्चालनसम्बन्धी कार्यविधि निर्माण भई पारित भइसकेको मन्त्री पौडेलको भनाइ छ।

स्वास्थ्य पूर्वाधारका यस्ता परियोजना समयमै सञ्चालनमा आउन नसक्दा जनताले सेवा पाउन ढिलो हुने तथ्यलाई उहाँले स्वीकार गर्नुभएको छ। अबको चुनौती प्रक्रियागत अड्चन हटाउँदै अस्पतालहरूलाई शीघ्र सञ्चालनमा ल्याउनेमा देखिन्छ।