सुदूरपश्चिममा गत रातिदेखि निरन्तर परेको वर्षाले महाकाली नदीमा पानीको प्रवाह तीव्र गतिमा बढेको छ। जिल्ला प्रहरी कार्यालय कञ्चनपुरका प्रवक्ता सागर बोहराका अनुसार आज बिहान ११ बजे महाकाली नदीमा पानीको बहाव एक लाख २६ हजार ७१२ क्यूसेक मापन गरिएको छ। अझै वर्षा जारी रहेकाले पानीको सतह थप उक्लन सक्ने चेतावनीसमेत उहाँले दिनुभयो।

पानीको प्रवाह बढेसँगै नेपाल–भारत सीमामा अवस्थित बनबासा पुल (शारदा ब्यारेज) मा ठूला सवारी साधन सञ्चालन अस्थायी रूपमा रोकिएको छ। प्रहरीले चार पाङ्ग्रे सवारी साधनको आवतजावत रोकेर दुई पाङ्ग्रे सवारी र पैदल यात्रीलाई मात्रै आवतजावतको अनुमति दिएको छ।

यस क्षेत्रको जलप्रवाह भारततर्फको जलाशय र तटीय बस्तीमा समेत प्रत्यक्ष प्रभाव पार्ने भएकाले स्थानीय प्रशासन र सुरक्षा निकाय सतर्क मोडमा छन्। मौसम र जलस्तरको अनुगमन भइरहेका कारण, सुरक्षाकर्मीले स्थानीयवासीलाई उच्च सतर्कता अपनाउन आग्रह गरेका छन्।