गण्डकी प्रदेश सरकारले म्याग्दीस्थित गलेश्वर आश्रमद्वारा देवघाटधाममा आयोजना हुन लागेको लक्षचण्डी विराट महायज्ञलाई सहयोग गर्ने जनाएको छ। बुधबार पोखरामा गलेश्वर धामका पीठाधीश महामण्डलेश्वर स्वामी आत्मानन्द गिरिजीसँगको भेटमा प्रदेशका मुख्यमन्त्री सुरेन्द्रराज पाण्डेले समर्थन र सहयोगको आश्वासन दिएका हुन्।

गलेश्वर आश्रमले आफ्नो शतवार्षिकी अवसरमा २०८२ माघ १८ देखि फागुन १७ गतेसम्म देवघाटधाममा महायज्ञ आयोजना गर्ने तयारी गरेको छ। आश्रमका अनुसार, कलियुगमा भगवती महामाया चण्डी र भगवान श्रीगणेशको उपासनाले परिवारमा सुख–शान्ति र समृद्धि ल्याउने तथा राष्ट्रको अभ्युदय हुने धार्मिक मान्यताअनुसार कार्यक्रम तय गरिएको हो।

 

महायज्ञको उद्देश्यबारे आश्रमले राष्ट्रशान्ति, समृद्धि, आत्मकल्याण, सर्वांगीण विकास र विश्वबन्धुत्वको भावना प्रवर्द्धन मुख्य प्राथमिकता रहेको जनाएको छ। यसका लागि सहयोग जुटाउने र विशिष्ट व्यक्तिहरूलाई निमन्त्रणा गर्ने उद्देश्यले आश्रमको टोली पोखरा पुगेको हो। टोलीमा स्वामी आत्मानन्द गिरिजीसँगै पदाधिकारीहरू सहभागी थिए।

अष्टाङ्ग योगसिद्ध योगीराज ईश्वरानन्द ब्रह्मचारी (गलेश्वर बाबा)द्वारा स्थापित गलेश्वर आश्रम हिन्दू धर्मको संवर्द्धन र देवघाटधामको धार्मिक–ऐतिहासिक महत्व संरक्षणमा सक्रिय रहँदै आएको संस्था हो। आश्रमले वेद–वेदाङ्ग विद्यालय, साधक–सन्त तथा तीर्थालुका लागि अन्न क्षेत्र, घरबारविहीन वृद्धवृद्धाका लागि कल्पवास, निःशुल्क धर्मार्थ अस्पताल, र करिब एक हजार जनालाई बास दिन सक्ने अतिथिगृह सञ्चालन गर्दै आएको छ।

धर्मार्थ अस्पतालमा स्वास्थ्य परीक्षण र औषधि निःशुल्क उपलब्ध गराइन्छ भने अतिथिगृहमा निःशुल्क भोजन र बसोबासको व्यवस्था छ। साथै, आश्रमले तिथिअनुसारका धार्मिक अनुष्ठान र अन्य कार्यक्रम नियमित सञ्चालन गर्दै आएको छ, जसले देवघाटधामलाई धार्मिक पर्यटनको महत्त्वपूर्ण केन्द्रका रूपमा स्थापित गर्न सहयोग पुर्‍याएको छ।