प्रधानमन्त्री केपी शर्मा ओलीले मन्त्रालयगत वार्षिक प्रगति समीक्षा तथा कार्यसम्पादन सम्झौता आदान–प्रदान कार्यक्रममा सबै मन्त्री र सचिवलाई मौलिक, नयाँ र युगान्तकारी काम अघि सार्न स्पष्ट निर्देशन दिनुभएको छ। सिंहदरबारमा आयोजित कार्यक्रममा प्रधानमन्त्रीले उत्पादनशीलता वृद्धि र गरिबीको दुष्चक्र तोड्न तत्काल प्रभावकारी कदम चाल्नुपर्नेमा जोड दिँदै, आगामी मङ्सिरभित्र दैलेखमा मिथेन ग्यासको परीक्षण उत्पादन सुरु गर्न, किसानलाई व्यावसायिक भैँसीपालनमा उन्मुख गराउन, देशव्यापी अर्ग्यानिक खेती अभियान सञ्चालन गर्न तथा सामाजिक सञ्जाललाई कानुनी दायरामा ल्याउन सम्बन्धित मन्त्रालयको ध्यानाकर्षण गराउनुभयो। साथै, ज्येष्ठ नागरिक संवाद भवन निर्माण, दशौँ राष्ट्रिय खेलकुद प्रतियोगिता तोकिएको समयमा सम्पन्न गर्ने, कीर्तिपुर क्रिकेट रंगशाला छिटो सम्पन्न गर्ने र भक्तपुरमा ठुलो रंगशाला निर्माणको तयारी अघि बढाउन पनि उहाँले निर्देशन दिनुभयो।

प्रधानमन्त्री ओलीले अन्तरिक्षमा नेपालको आफ्नै अर्बिटको प्रयोग, रेल र सेक्युरिटी प्रेस सञ्चालन, रेलवे विस्तार, सुनकोसी–मरिन, भेरी–बबई र काठमाडौँ–तराई मधेस द्रुतमार्गजस्ता आयोजनामा गति ल्याउन, योग तथा आरोग्यता अभियान सञ्चालन गर्न र मापदण्डका आधारमा कर्मचारी सरुवा लागू गर्न आग्रह गर्नुभयो। यी सबै निर्देशनलाई उहाँले ‘प्रतिनिधिमूलक’ भन्दै प्रत्येक मन्त्रालयले आफ्नो क्षेत्रअनुसार परिवर्तनकारी योजना तयार गरी भदौको अन्त्यसम्म कार्यान्वयन मार्गचित्र तय गर्न आह्वान गर्नुभयो।

उक्त कार्यक्रममा चालु आर्थिक वर्षका प्रमुख काम र लक्ष्यबारे प्रधानमन्त्री र मन्त्रीबीच कार्यसम्पादन सम्झौता गरिएको थियो। ‘समृद्ध नेपाल, सुखी नेपाली’को राष्ट्रिय लक्ष्य पूरा गर्न पूर्वाधार निर्माण र सेवा प्रवाहमा गुणात्मक सुधार ल्याउने यो अभ्यास प्रधानमन्त्री ओलीको अघिल्लो कार्यकालदेखि निरन्तर जारी रहेको हो। सरकारको आगामी महिनामा हुने मूल्याङ्कन बैठकले यी निर्देशनहरूलाई ठोस कार्ययोजनामा रूपान्तरण गर्ने अपेक्षा गरिएको छ।