दाङको गढवा गाउँपालिका–८ अन्तर्गत कोइलाबास–मुसिनाका ग्रामीण सडक बर्षको कारणले अवरुद्ध भएपछि स्थानीयलाई दैनिक आवतजावतका लागि भारतीय भूभाग हुँदै हिंड्नुपर्ने बाध्यता सिर्जना भएको छ । कच्ची सडकमा पहिरो खस्नु र खोलाले भाग–भागमा सडक बगाउँदा पैदल यातायातसम्म अवरुद्ध भएको हो ।

कोइलाबास निवासी गोविन्द अधिकारीका अनुसार मुसिनाका क्षेत्रका बासिन्दाको मुख्य बजार, विद्यालय र स्वास्थ्य सेवा कोइलाबासमै केन्द्रीत छ । तर, सडक बिग्रिएपछि सामान किनमेल, बालबालिकाको पढाइ र बिरामीको उपचारका लागि भारतीय क्षेत्रको बाटो प्रयोग गर्नुपरेको छ । भारतीय भूभागमा पर्ने राष्ट्रिय निकुञ्जको जङ्गल हुँदै हिंड्दा जङ्गली जनावरको जोखिम मात्र होइन, निकुञ्जका कर्मचारीले सिकार गर्न आएको हो कि भन्ने शंका गर्ने अवस्थासमेत रहेको अधिकारीको भनाइ छ ।

यस्तै, राजपुर गाउँपालिका–७ अन्तर्गत गोठुवा–भालुमारे–सुनपथरी सडक पनि वर्षासँगै अवरुद्ध भएको छ । स्थानीय श्रीराम यादवका अनुसार हिउँदमा सहज चल्ने सवारीसाधन वर्षायाममा सडक बग्दा पूर्णरूपमा बन्द हुने गर्छ, जसले विशेषगरी बिरामी अवस्थाका व्यक्तिलाई ठूलो जोखिममा पार्छ ।

नेपाल–भारत सीमा नजिकैको शान्तिनगर गाउँपालिका–१, पेदीखोला–बाघचौर हुँदै बाघबिसौना जोड्ने सडक पनि पहिरो र भत्किनाले बन्द भएको छ । बाघचौरका मीनबहादुर खत्रीका अनुसार सुक्खा मौसममा ट्याक्सी चल्ने सडकमा अहिले पैदल हिँड्नसमेत कठिन भएको छ । पहिलेजस्तो बजारसम्म सहज पुग्ने सुविधा हराएपछि स्थानीयलाई करिब एक घण्टा पैदल यात्रा गर्नुपर्ने बाध्यता छ ।

राजपुर गाउँपालिका उपाध्यक्ष धनपतिदेवी यादवले बर्सेनि मनसुनको समयमा नाकावासीलाई सडक अवरोधको समस्या हुने गरेको बताइन् । उनका अनुसार गाउँपालिकाले सडक विस्तार र मर्मतमा पहल गरे पनि लगातारको वर्षा, पहिरो र स्रोतसाधनको अभावका कारण तत्काल समाधान कठिन हुन्छ ।

यस्तो अवस्थाले भौगोलिक दुर्गमता र मौसमी जोखिमले सीमावर्ती बस्तीका दैनिकी कस्तो असुरक्षित र निर्भरशील बनेको छ भन्ने स्पष्ट देखाउँछ । मौसम फेरिएपछि सडक सुचारु हुने भए पनि दीर्घकालीन समाधान बिना समस्या हरेक वर्ष दोहोरिने संकेत प्रष्ट छ ।