प्रधानमन्त्री केपी शर्मा ओली शुक्रबार महोत्तरीको सोनमा गाउँपालिकामा कालोपत्रे सडक निर्माणको शिलान्यास गर्न आउने कार्यक्रम तय भएको छ।

पूर्वाधार विकास कार्यालय जलेश्वरका प्रमुख राजेलाल कर्णका अनुसार शिलान्यास समारोह दिउँसो १ बजे हुनेछ।

कर्णले भनेका छन्, मधेश प्रदेश सरकारको भौतिक पूर्वाधार विकास मन्त्रालयको साझेदारी र विश्व बैंकको ऋण सहयोगमा सञ्चालित ‘प्रादेशिक तथा स्थानीय सडक सुधार कार्यक्रम’अन्तर्गत हुलाकी राजमार्ग-रघुनाथपुर बजार–सोनमा-तरहारी-सुन्दरपुर खण्डको ८.३८४ किलोमिटर सडक कालोपत्रे हुनेछ।

यस परियोजनाको काम २०८३ साल चैत ११ गतेभित्र सक्ने लक्ष्य छ। कुल बजेट ३४ करोड ६९ लाख ५० हजार ६१६ रुपियाँ विश्व बैंकको ऋणबाट व्यवस्थापन हुने भए पनि, टेन्डर प्रक्रियामार्फत ढुकुछु निर्माण कम्पनी प्रा.लि.सँग १९ करोड ७ लाख ८३ हजार ६१८ रुपियाँ (भ्याटसहित)मा सम्झौता भएको कर्णले जानकारी दिए।

कार्यक्रमकाे मूल उद्देश्य मधेश प्रदेशका २१ स्थानीय तहका केन्द्रहरूलाई पक्की सडक सञ्जालसँग जोड्नु रहेको र यो खण्ड सोही योजनाको हिस्सा भएको कार्यालयको भनाइ छ।

शिलान्यासपछि कार्यान्वयनको गति, बजेटीय पारदर्शिता र समयसीमाको पालना कसरी हुन्छ- स्थानीय बासिन्दाले चाँडै नै प्रत्यक्ष अनुभूति गर्ने अपेक्षा राखिएकाे छ।