नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपालको कृषि आत्मनिर्भरता सुनिश्चित गर्न प्रत्येक स्थानीय तहले आफ्नो भौगोलिक र वातावरणीय अवस्थाअनुसार उपयुक्त कृषि मोडल अपनाउनुपर्नेमा जोड दिनुभएको छ। भक्तपुरको चाँगुनारायणमा आज सम्पन्न ‘सिटी एभोकाडो अभियान’ समापन तथा अभियन्ता सम्मान कार्यक्रममा बोल्दै उहाँले चाँगुनारायणको सफलताबाट अन्य स्थानीय तहहरूले पनि सिक्नुपर्ने धारणा व्यक्त गर्नुभयो।

दाहालका अनुसार, देशभरका ७५३ स्थानीय तहहरूले आफ्ना क्षेत्रमा माटो र मौसम अनुकूल कृषि उत्पादन र फलफूल खेतीमा ध्यान केन्द्रित गर्न सके कृषि आत्मनिर्भरता मात्र होइन, समग्र राष्ट्रिय अर्थतन्त्रको मजबुती सम्भव हुन्छ। उहाँले आत्मनिर्भर अर्थतन्त्रको मौलिक मोडल निर्माणलाई अपरिहार्य ठहर गर्दै पछिल्ला वर्षहरूमा युवाहरूको समूहगत कृषि उद्यमतर्फको रुचि सकारात्मक सङ्केत भएको टिप्पणी गर्नुभयो।

“विदेशीको नक्कल गर्ने प्रवृत्ति दुर्भाग्यपूर्ण हो,” दाहालले भन्नुभयो, “आफ्नै देशमा रोजगारी सिर्जना गर्नेतर्फ सबैले पहल र प्रोत्साहन गर्नुपर्छ। सबै जुटे आत्मनिर्भर बन्न धेरै समय लाग्दैन।” उहाँले नेपालको मौलिक संस्कृतिप्रति गर्व गर्ने मानसिकता अझै मजबुत नहुनु आजको चुनौती भएको उल्लेख गर्नुभयो।

दाहालले कृषि, पर्यटन, ऊर्जा र प्राकृतिक स्रोतसाधनजस्ता क्षेत्रमा नेपालमा अपार सम्भावना रहेको बताउँदै, सकारात्मक सोच र रचनात्मक काममार्फत ती सम्भावनालाई उपयोग गर्न सकिए आर्थिक समृद्धि टाढा नहुने धारणा राख्नुभयो। उहाँले उत्पादन वृद्धिद्वारा रोजगारी सिर्जना गरी विदेश रोजगारीको संस्कृतिलाई निरुत्साहित गर्नुपर्ने र नयाँ नेपाल निर्माणका लागि यो अभियानलाई सबैले साथ दिनुपर्नेमा जोड दिनुभयो।

कार्यक्रममा बागमती प्रदेशका स्वास्थ्यमन्त्री किरण थापा, चाँगुनारायण नगरपालिकाका पूर्व प्रमुख सोम मिश्र, अभियानका अभियन्ता तथा माओवादी केन्द्रका नेता डिपी ढकाल, र संयोजक नरेश खड्कालगायत वक्ताहरूले एभोकाडो अभियानले स्थानीयस्तरमा ल्याएको सकारात्मक परिवर्तनबारे धारणा राखेका थिए।